Вандроўка па мясцінах гістарычнай Літвы адбылася 20 чэрвеня

Падарожжа здзейснілі ўдзельнікі канферэнцыі “Міленіюм Літвы”, якая прайшла напярэдадні 19 чэрвеня ў навуковай бібліятэцы імя Якуба Коласа Нацыянальнай акадэміі навук Беларусі, а таксама запрошаныя госці. Падчас вандроўкі навукоўцы наведалі вёску Літва Маладзечанскага раёну, Літоўку Наваградскага раёну, вёскі Гарадзішча і Гарадок, горад Наваградак.

Выбар мясцінаў быў невыпадковы. Як адзначыў падчас канферэнцыі гісторык Леанід Акаловіч, назоў “Літва” здавён адносіцца да тэрыторыі Беларусі. Корань слова “літ” утрымліваецца ў велізарнай колькасці вёсак і мястэчак Беларусі, а да захопу тэрыторыі Расійскай імперыяй мясцовыя жыхары называлі сябе “літвінамі”. У Наваградку ж каранаваўся першы кароль Літвы Міндоўг. Маршрут вандроўкі быў распрацаваны мастаком Міколам Купавам.

У вандроўцы ўзялі ўдзел Леанід Акаловіч, Здзіслаў Сціцька, Эдуард Зайкоўскі, Мікола Купава.

Навукоўцы маюць намер зладзіць падарожжа па іншых мясцінах, звязаных з гістарычнай Літвой, у верасні гэтага году. Акрамя таго, да канца году пройдзе шэраг іншых культурніцкіх мерапрыемстваў: выставаў, прэзентацый, спектакляў, прысвечаных святкаванню тысячагоддзя старажытнай Літвы.