1409: У Берасці скончылася нарада Ягайлы і Вітаўта пра план сумесных вайсковых дзеянняў супраць Тэўтонскага ордэна (пач. 30.11.1409).

1432: Ашмянская бітва між войскамі вялікіх князёў Свідрыгайлы і Жыгімонта Кейстутавіча. Загінула больш за 10 тыс. чалавек.

1506: Жыгімонт Стары абраны каралём польскім.

1812: Расійскія войскі занялі Гародню ў ходзе вайны 1812 года.

1914: Нарадзіўся Часлаў Сіповіч, беларускі ўніяцкі біскуп, заснавальнік Беларускай бібліятэкі і музэя імя Францішка Скарыны ў Лондане.

1922: Выданне Леапольдам Родзевічам у Вільні першага нумару газеты “Наша будучыня”.

1926: У БССР увайшлі Рэчыцкі і Гомельскі паветы.

1935: Нарадзіўся Эдуард Скобелеў, беларускі пісьменнік.

1937: Органамі НКВД былі знішчаныя фалькларыст і кампазытар Антон Грыневіч, палітык і літаратуразнаўца Ігнат Дварчанін, а таксама яшчэ адзін дзеяч беларускага руху ў Заходняй Беларусі Язэп Гаўрылік. За сваю беларускую дзейнасць на Віленшчыне Дварчанін і Гаўрылік былі арыштаваныя польскімі ўладамі і прысуджаныя да вялікіх тэрмінаў зняволеньня, пасля шляхам абмену палітвязняў яны трапілі ў Савецкі Саюз, дзе іх і расстралялі.

1991: Падпісаныя Белавежскія пагадненні ў рэзыдэнцыі Віскулі ў Белавежскай пушчы. Тут кіраўнікі Беларусі, Расіі і Украіны Шушкевіч, Ельцын і Краўчук, а таксама кіраўнікі ўрадаў трох краінаў афіцыйна дэнансавалі дагавор аб утварэнні СССР і ўтварылі Садружнасць Незалежных Дзяржаваў.

1994: Праз нязгоду з курсам прэзыдэнта Лукашэнкі з ягонай каманды афіцыйна сышоў Віктар Ганчар.

1999: Утварэнне Саюзнай дзяржавы Беларусі і Расіі.