Вязынка запрашае на Купалле

7 ліпеня 1882 года (па новаму стылю) у самым цэнтры Беларусі, у фальварку Вязынка, з’явіўся на свет Іван Дамінікавіч Луцэвіч. Здарылася гэта амаль на свята Івана Купалы, і потым, калі паэту, паводле беларускай традыцыі, спатрэбіцца псеўданім, ён спыніцца на гэтым адзіным — Янка Купала.

Да нашага часу жыве ў славян легенда пра тое, што ў самую кароткую летнюю ноч, у ноч на Івана Купалу, калі здзяйсняюцца самыя неверагодныя цуды, зацвітае на імгненне кветка папараці. Хто яе знойдзе — знойдзе і шчасце. Народнае павер’е сцвярджае: паміж лісцямі, падобнымі на крылы арла, нараджаецца на свет вогненная кветка. І толькі чалавек са смелым сэрцам і чыстай душой адважыцца сарваць кветку і не забаіцца ўступіць у двубой з нячыстай сілай, але ўжо тады смельчаку будуць падуладныя ўсе таямніцы і чары. З гэтай легенды і пачынаецца мастацкі свет Янкі Купалы, яе водгулле чуецца ва ўсёй яго творчасці.

Завяршалася купальскае свята назіраннем за ўзыходам сонца. Яно нібы «гуляла», пералівалася, дзялілася на некалькі частак, якія разбягаліся і зноў зыходзіліся ў адзінае кола. Свята Купалле — гімн сонцу, напамін пра тое, што святло заўсёды перасільвае цемру.

Праграма святкавання.

18.00 — купальскія песні з элементамі традыцыйнага абраду ў выкананні этнагурта «Ветах».

19.00 — літаратурна-музычная праграма «Казкай векаў блізкіх і далёкіх клічам, сонца, цябе…» — песні на словы Янкі Купалы і музычныя кампазіцыі прагучаць у выкананні беларускіх артыстаў:

19.00 — гурта «Alta mente»,

19.40 — Алеся Камоцкага,

20.20 — дуэта «Аксаміт»,

20.50 — Дар’і Кадамскай,

21.30 — Андрэя Касцені,

22.10 — Таццяны Беланогай,

22.50 — Яраша Малішэўскага.

У праграме пляценне купальскіх вянкоў, пошукі папараць-кветкі, майстар-клас старадаўніх беларускіх танцаў суполкі «Гістрыён» ў суправаджэнні гурта «Пераплут».

Кошт: 3 000 рубл.

P.S. Для Іванаў уваход вольны, для Марый таксама, але толькі ў тым выпадку, калі яны прыдуць у нацыянальных строях і з купальскімі вянкамі.