Сёння святкуе дзень нараджэння паэт, пісьменнік і палітык Уладзімір Някляеў.
Уладзімір Някляеў, крыніца: twitter.com
Уладзімір Пракопавіч Някляеў нарадзіўся 11 ліпеня 1946 года ў Смаргоні. Дзіцячыя гады пражыў у Крэве.
Уладзімір Някляеў дэбютаваў вершамі ў 1970 годзе. Аўтар кніг паэзіі «Адкрыццё» (1976), «Вынаходцы вятроў» (1979), «Знак аховы» (1983), «Местное время» (1983), «Наскрозь» (вершы і паэмы, 1985), «Дерево боли» (1986), «Галубіная пошта» (1987), «Вежа» (1989), «Прошча» (1996), «Выбранае» (1998), «Так» (2004), «Окно» (2010), «Лісты да Волі» (Вільня, 2011), «Толькі вершы» (2016), «Знічы кахання» (Варшава, 2019). Апошнім часам выступае пераважна як празаік (апавяданні «Хайбах», «Чмель і вандроўнік», «Залатая Арда», аповесці «Прага», «Няхай жыве 1 Мая» і інш.). Паводле аповесці «Вежа», часопіс «Полымя», 1988, А. Дударавым была напісана фантасмагарычная камедыя «Вавілон», пастаўленая Мікалаем Мацкевічам (1990).
Аўтар рамана «Лабух» (2003), кнігі прозы «Цэнтр Еўропы» (2008), рамана «Аўтамат з газіроўкай з сіропам і без» (2012), кнігі літаратурных эсэ «Знакі прыпынку» (2013). Аўтар драмы «Армагедон» (часопіс «Полымя», 2010). Выступае таксама як эсэіст.
У 2011 годзе Уладзімір Някляеў выдаў новую кнігу «Лісты да Волі», у яе ўвайшлі творы, напісаныя падчас зняволення ў СІЗА КДБ. Раман «Аўтамат з газіроўкай з сіропам і без» напісаны ў 2012 годзе. Яго непаўналетні герой прыязджае з правінцыі ў сталічны Мінск часоў хрушчоўскай адлігі. Ён вучыцца ў радыётэхнічным тэхнікуме, збліжаецца з дысідэнтамі — дакладней, звычайнымі стылягамі, якіх саветы трактавалі як ворагаў сістэмы, — закохваецца, сутыкаецца са злом, якое ўвасоблена ў КДБ. За свой раман Уладзімір Някляеў стаў лаўрэатам першай прэміі імя Ежы Гедройца.
Яго творчасць адметная публіцыстычнасцю, дынамічнасцю паэтычнай думкі, канкрэтна-пачуццёвай вобразнасцю.
У перакладзе на замежныя мовы выйшлі кнігі «Галубіная пошта» (Польшча), «Паланэз» (Літва), «Чырвоны захад» (Фінляндыя), «Лісты да свабоды» (Швецыя) ды іншыя.
Уладзімір Някляеў падчас прэзентацыі кнігі, крыніца: twitter.com
На дадзены момаент, апошні раман Уладзіміра Някляева «Гэй Бэн Гіном» выйшаў у 2021 годзе, прысвечаны гісторыя жыцця і смерці Янкі Купалы ў перапляценні з фактамі біяграфіі самога Уладзіміра Някляева.
Шчыра віншуем спадара Уладзіміра з днём нараджэння і зычым яму моцнага здароўя і творчых поспехаў!
Чытайце таксама: Будзьма беларусамі! » «У нас усё будзе!» Уладзімір Някляеў пра новы раман, 2020 год і планы на будучыню
