Заснавальнікі Беларускага Свабоднага Тэатра Мікалай Халезін і Наталля Каляда спрычыніліся да ўзнаўлення Pink Floyd і паспрыялі запісу іх новай песні Hey Hey Rise Up, прысвечанай Украіне, паведамляе @BelarusWithUkraine.
Гэтую гісторыю расказаў у сваім тэлеграм-канале Мікалай Халезін:
«У 2015 годзе мы праводзілі ў Лондане музычны фестываль Standing a Revolution. I’m with the Banned, для ўдзелу ў якім запрасілі шматлікіх музыкаў і акцёраў. У ліку іншых — Дэвіда Гілмара і ўкраінскі гурт "Бумбокс". Выступленне адбылося, але, на жаль, з-за візавай праблемы, Андрэй Хлыўнюк тады ўдзелу ў канцэрце не прыняў.
А нядаўна гісторыя атрымала працяг. Калі Андрэя паранілі, Наташа патэлефанавала Дэвіду. А заадно адправіла яму спасылку на відэа, дзе Андрэй на пустой кіеўскай вуліцы ў ваеннай экіпіроўцы спявае "Ой, у лузі".
Дэвід і Андрэй пазней пагаварылі, праз некалькі дзён Дэвід напісаў Наташы "сёння будзем запісваць песню". Але ўсё аказалася яшчэ больш эпічна».
Нагадаем, што запісы гурта Pink Floyd цяпер немагчыма паслухаць на стрымінгавых сервісах у Расіі і Беларусі, на такі крок музыканты пайшлі на знак салідарнасці з Украінай.
