Пасьля невялікага перапынку ў сваёй дзейнасьці гурт HandmadE вяртаецца на сцэну. На фэстывалю «Травень» музыкі зьбіраюцца зьдзівіць сваіх прыхільнікаў.
Пасьля спробы патрапіць на «Эўравізію» увосень мінулага году, гуртHandmadE узяў паўзу, якую перапыняе сэрыяй вясновых канцэртаў. «Пасьля супольнага запісу з тайбаксёрам Віталём Гурковым наш трэк«Бег па канатах» трапіў у тэчку «Не ставіць ніколі» на некалькіх менскіх радыёстанцыях, ― распавядае музыка гурта Ўладзімер Пыльчанка. ― Гэта быў добры знак, цяпер мы аднавілі рэпетыцыі».
На фэстывалю «Травень» музыкі зьбіраюцца прэзэнтаваць некалькі новых песень. Сярод іх – «Акіян», «Сан Рамон» і «Сонца, не сьвяці ты гэтым паскудам». Апошні згаданы трэк, са слоў вакаліста каманды Яўгена Валошына, зьдзівіць слухачоў, якія прызвычаіліся да рамантычнага HandmadE: «Усім, хто зацікаўлены трансфармацыямі, якія адбываюцца з нашым гуртом, запрашаем на наш выступ», – кажа музыка.
HandmadE – адзін з самых яскравых беларускіх гуртоў апошніх год. Ён быў утвораны ў 2009 у Менску вакалістам Яўгенам Валошыным і гітарыстам Андрэем Маркуцам («Рэй», Neo). Асноўную частку тэкстаў піша паэт Глеб Лабадзенка. Грае ў стылістыцы «ўрбаністычнага рэгі» і джаз-року. Дэбютны альбом «DEMO. The Music from Unfreedom» прэзэнтаваў на Tuzin.fm, у СD-вэрсіі рэліз мае назву «На вачах тваіх».
Фэстываль «Травень» пройдзе на сцэне клюбу «Мулен Руж» 18 траўня. Яго ўдзельнікі будуць прадстаўляцца паступова на сайтах заснавальнікаў фэсту Tuzin.fm, Budzma.by і Graffiti.by.
Да 18 красавіка квіткі на фэст можна набыць па 110 000 (танцпляц, у клюбе «Графіці»), 120 000 (танцпляц, на сайце Kvitki.by) і 140 000 (столік, набыць можна толькі ў клюбе «Графіці»). Пасьля квіткі будуць каштаваць даражэй.
