Бард Таццяна Салаўёва зладзіла для гарадзенскіх слухачоў невялікае свята музыкі ў антыкавярні “Жывы час”.
Канцэрт складаўся з умоўных трох частак, дзе беларускія народныя песні перамешваліся з аўтарскімі. Прагучала таксама ўжо вядомая ў Беларусі песня на словы мінскай паэткі Валярыны Куставай “Парыжанін”, кліп да якой хутка пабачаць жыхары краіны. Дапамагалі Таццяне музыкі Ігар Адасік і Аляксандр Блахін.
Таццяна падзялілася з “Будзьма беларусамі!” ўражаннямі ад канцэрта і будучымі планамі:
— Канцэрт быў вельмі неаднародны: там была і традыцыйная аўтарская песня, і стылістычныя эксперыменты з пошукамі новага гучання, і беларускія народныя песні. Апрацоўкі беларускіх народных песень — для мяне цяпер галоўны занятак.
— Гучала песня на словы Валярыны Куставай. На словы якіх яшчэ аўтараў вы выконваеце песні?
— Уладзімір Захараў выконвае песню на словы Юрыя Гуменюка “Агністы мак”, я яе таксама выконваю. Але гэта не мая песня, і я яе спяваю толькі тады, калі мы ўдваіх з Уладзем выступаем. Таксама выконваю песню Анатоля Брусевіча “Надзённасць патушыць апошнія зоры” і разам з Уладзімірам Захаравым — цудоўны твор на словы Уладзіміра Караткевіча “Прыпадзі да мяне”.
— Чаго цікавага чакаць ад вас найбліжэйшым часам?
— Цяпер на песню “Парыжанін” запісваем кліп. Таксама ў мяне ёсць мара напісаць музычны твор, які не назавеш песняй, на верш Караткевіча “Калі паміраюць…” Я ў гэты верш закаханая гадоў 20, і ў мяне патроху спее творчая задума.
Андрэй Мялешка
Фота Андрэя Мялешкі