Ініцыятарам імпрэзы стаў гурт KRIWI, іх падтрымалі іншыя артысты і Беларуская Рада Культуры. Сабраныя free donation пойдуць на дапамогу Украіне.
Канцэрт адбыўся ў варшаўскім бары Beer Station 8 сакавіка. Гэта адно з самых вядомых беларускіх месцаў у польскай сталіцы. Тут часта праходзяць беларускія імпрэзы, а ў меню пачэснае месца займаюць дранікі. Сцэну ўпрыгожваў украінскі сцяг. Людзей было поўнае памяшканне. Час ад часу нехта з наведвальнікаў ці выступоўцаў выгукваў «Слава Украіне!» і заля дружна адгукалася «Героям слава!», потым адразу гучала «Жыве Беларусь!» і «Жыве вечна!»
Сёлета споўнілася 25 год гурту KRIWI, які планаваў вялікі сольны канцэрт. Але калі пачалася вайна, то вырашылі граць разам з іншымі беларускімі музыкамі. Выступілі Аляксандр Памідораў, Дзяніс Тарасенка («РСП»), Анастасія Шпакоўская (Naka) і Павал Трыпуць (Volski), яшчэ некалькі маладых артыстак. Некаторыя з музыкаў бачылі вайну ва Украіне на ўласныя вочы. У некаторых там родныя і сябры. Хаця, бадай, усе украінцы цяпер сябры беларусам. KRIWI пачалі свой выступ з гімна Украіны.
Анастасія Шпакоўская папрасіла не забывацца, што канцэрт арганізаваны не столькі для забавы, колькі для напаміну пра тое, што адбываецца.
Данаты збірала сяброўка лідаркі гурта KRIWI Веранікі Кругловай спадарыня Ганна, якая адмыслова прыехала з Берліна на канцэрт. Яе называюць берлінскай Нінай Багінскай. Са сцэны яна распавяла, што ўжо амаль два гады апранаецца выключна ў бела-чырвонай гаме. Пасля прадстаўлення Ганны Берлінскай данаты пасыпаліся ў скрынку яшчэ актыўней.
Украінскай мовы сярод наведвальнікаў асабліва не было чуваць, збольшага прыйшлі беларусы, троху палякаў. Спадзяемся, нашым украінскім сябрам будзе прыемна даведацца, што мы іх падтрымліваем, а сабраная дапамога трапіць да іх як мага хутчэй.
Алена Ляшкевіч, budzma.org
