Каля тысячы чалавек прыйшлі на дабрачынны фестываль, які прайшоў 6-7 мая ў мінскім клубе “Рэактар”. На сцэне выступіў з дзесятак гуртоў, сыграла нават “Серебряная свадьба”, хоць яе вакалістка вось-вось павінна нарадзіць. Дзякуючы беларускім музыкам дзеткі з дома-інтэрнату ў Навінках паедуць на аздараўленчы адпачынак.
гурт Нагуаль
Вядучыя ладзяць аукцыён дзіцячай творчасці
“Вы ўзялі на сябе функцыі дзяржавы, дзякуй вам за гэта. Такі канцэрт можа спатрэбіцца кожнаму”, – прамаўляе са сцэны Аляксей Варсоба з Port Mone. Гэты гурт, як і астатнія ўдзельнікі імпрэзы, згадзіліся даць бясплатны выступ у межах 12-гадзіннага марафону. Атрыманыя грошы з канцэрту пойдуць на аплату аздараўленчага адпачынку для дзетак з дома-інтэрнэта для інвалідаў з асаблівасцямі псіхафізічнага развіцця. Port Mone падаравалі свае галоўныя песні з альбома “D.I.P.” і прадставілі пару новых кампазіцый. Адыгралі моўчкі, іх інструментальныя фантазіі суправаджаў відэашэраг у стылі National Geografic. Людзі падцягнуліся на танцпляц з першага ж гуку, што рэдкасць для такой музыкі.
Папа Бо Селекта
Аддис-Абеба
Пасля на сцэне танчыў лідэр гурта “Нагуаль” Леанід Паўлёнак, які чамусці дзякаваў, вітаўся і развітваўся з публікай па-ангельску і па-польску. Запальвалі лепшыя рэгі-групы краіны – Botanic Project і “Аддис Абеба” на чале з Дзімам Івановым, якога вядучыя прадставілі, як “Дима-садись- обедать”. Якраз у гэтым гурце грае бубнач Аляксей Тарасевіч – надзвычай пазітыўны чалавек, менавіта яму належыць ідэя правядзення дабрачыннага фэсту. Лёша працуе выхавацелем у дзіцячым доме-інтэрнаце ў Навінках. У пэўны момант ён адчуў, што можа зрабіць для дзетак яшчэ больш, чым робіць штодзённа і задумаў з дапамогай сваіх сяброў і калегаў сабраць для іх грошы на паездку да мора. “Нас прыйшло вельмі шмат, значыць вельмі добры будзе адпачынак для дзетак”, – з нязмушанай усмешкай паведаміў ён. “Мы разам робім добрую справу, так і трэба, інакш навошта жыць. Мы разам зменім гэты дзяўбаны свет!”, – падхапіў гітарыст гурта “Петля пристрастия”, дзе Лёша Тарасевіч таксама грае.
Петля пристрастия
Силикон
На “Пятлі” пачаўся поўны кавардак. Дзяўчаты ляталі па-над заляй даўжэй за хлопцаў. Прыгаючы са сцэны ўпасці проста на падлогу было немагчыма – настолькі шчыльна стаялі людзі. У клюбе “Рэактар” у гэты вечар было каля тысячы чалавек.
Між выступамі на сцэне ладзіўся аўкцыон, прадавалі творы дзіцячай творчасці. Адзін з лотаў – дзіцячы бансай набыў фатограф budzma.org Аляксандр “Таранціна” Ждановіч.
“Серебряная свадьба”
Пасля апоўначы ніхто і не думаў разыходзіцца. Урэшце дачакаліся на “Серебряную свадьбу”, якая з’явілася на сцэне ля другой гадзіны ночы. Вакалістка гурта Света Бень чакае на нараджэнне дзіцёнка, таму апошнія месяцы гурт не выступае. Нават сумесны выступ з Tigger Lillies адмянілі. Але на гэтым канцэрце вырашылі сыграць. “Дзеля любові”, – як патлумачыла Света.
