Некамерцыйныя арганізацыі ў Беларусі збіраюцца кантраляваць, каб яны не «фінансавалі тэрарызм», піша Hrodna.life. Гэтым зоймецца Камітэт дзяржаўнага кантролю.
У ведамстве збіраюцца выпрацаваць механізмы кантролю за некамерцыйнымі арганізацыямі. У планах — карэкціроўка заканадаўства, навучальныя мерапрыемствы з прадстаўнікамі НКА і «спецыяльнае маштабнае мерапрыемства» па ацэнцы рызык. Ацэнку збіраюцца правесці найбліжэйшым часам.
Ацэнка мае дзве асноўныя задачы. Першая — выявіць формы НКА, у якіх ніжэй рызыка ўцягвання ў злачынную дзейнасць. Другая — сканцэнтраваць кантроль на тых формах НКА, якім прысвояць высокую і сярэднюю ступень рызыкі.
Сітуацыя ў краіне
У сакавіку 2022 года колькасць прымусова ліквідаваных некамерцыйных арганізацый дасягнула адзнакі 382 арганізацый, а колькасць некамерцыйных арганізацый, якія прынялі рашэнне аб самастойнай ліквідацыі — 271. Такім чынам, грамадскі сектар Беларусі, пачынаючы з 2020 года, страціў ужо 653 зарэгістраваныя грамадскія аб’яднанни, недзяржаўныя ўстановы і асацыяцыі, падлічылі праваабаронцы Lawtrend.
