13 лістапада былі падведзеныя вынікі конкурсу на стварэнне помніка Глебу Менскаму, які ў наступным годзе плануюць усталяваць у цэнтры сталіцы. Партал TUT.BY апублікаваў фота праекта, які заняў першае месца ў конкурсе.
Фота: Станіслаў Шаршукоў, TUT.BY
Каб зразумець, наколькі вобраз князя, увасоблены ў помніку, адпавядае гістарычным рэаліям, мы звярнуліся па каментар да Мікалая Плавінскага, спецыяліста па гісторыі сярэднявечнага ўзбраення, кандыдата гістарычных навук, дацэнта.
– Ідэя ўсталявання помніка менскаму князю Глебу Усяславічу можа толькі ўсяляк вітацца. Але яе рэалізацыя выклікае сур’ёзныя пытанне. Мы ні ў якім выпадку не імкнёмся ацэньваць мастацкія вартасці праекта. Аднак з пункту погляду адпаведнасці гістарычным рэаліям помнік не вытрымлівае ніякай крытыкі. У сваім сённяшнім выглядзе Глеб Усяславіч больш падобны на героя казак: цалкам фантастычныя даспех, шлем і наручы, якія ніяк не адпавядаюць гістарычным рэаліям, дзіўны конскі рыштунак і боты вершніка. Нават кальчугу скульптар выявіў з памылкай, хаця і вельмі падрабязна.
Зрэшты, з’яўленне такога праекта – гэта не праблема асобнага скульптара, а пытанне адсутнасці гістарычнай экспертызы помнікаў манументальнага дойлідства ў нашай краіне. Цалкам відавочна, што такія важныя для нацыянальнай свядомасці грамадства аб’екты, як помнікі выбітным гістарычным асобам, мусяць праходзіць не толькі мастацкую экспертызу, але і прафесійную ацэнку спецыялістаў па гісторыі матэрыяльнай культуры адпаведнай эпохі.
Мікалай Плавінскі, фота Аляксандра Саенкі
Нагадаем, што ў наступным годзе будзе 900 гадоў з дня смерці князя Глеба Менскага. Менавіта з гэтай нагоды насупраць Кафедральнага сабора ў Верхнім горадзе мае з’явіцца першая конная скульптура ў Мінску.
