На мінулым тыдні ў беларускае інфармацыйнае поле ўварваўся берлінскі музычны праект Hara Crash, піша @by_culture.
Ута Швэйдзіц (Uta Šwejdźic) і яе муж Міхал, якія родам з Лужыцы (рэгіён са сваёй унікальнай культурай на памежжы Германіі, Польшчы і Чэхіі), на сваёй роднай мове запісалі песню Swojowola («Сваволя»), прысвечаную Беларусі і пратэстам, што пачаліся ўлетку 2020-га. А беларускі рэжысёр зняў для музыкаў атмасфернае відэа:
Ута Швэйдзіц — даўняя сяброўка Беларусі. Яна прыязджала сюды з цэлым турам са сваім ранейшым гуртом Berlinska Dróha, выступала на адной сцэне з «Дзецюкамі», «Сьцяной», яна пільна сочыць за падзеямі ў нашай краіне.
Ута Швэйдзіц
Беларуская рада культуры звязалася з Утай і спытала ў яе пра падтрымку Беларусі і месца музыкаў у супольным пратэсце.
«Яшчэ ў дзяцінстве я пачала цікавіцца культурамі Усходняй Еўропы. І мне вельмі сумна, што ў Еўропе існуе дыктатура, якую стварыў Лукашэнка».
«Чаму я падтрымліваю Беларусь? Гэтае пытанне гучыць для мяне як камплімент. Падтрымліваю, бо ў гэтай краіне маю сяброў і час ад часу чую, што там адбываецца. І, магчыма, нашы краіны не так далёка адна ад адной, як можа падавацца».
Чытаць па тэме: Спевакі з Германіі запісалі песню ў падтрымку беларусаў на лужыцкай мове
«Колькі гадоў таму — у 2014-м мы з гуртом Berlinska Dróha былі ў туры па Беларусі, мой сябар тады нават зняў дакументальны фільм. І сёння ў мяне ўзнікае ўражанне, што кадры з таго часу, якія мы і сёння раз-пораз пераглядаем у Германіі, сталі далёкія ад рэчаіснасці. Тое, што я бачу і чую ад знаёмых, выглядае намнога горшым за становішча ў краіне колькі гадоў таму».
«Асабліва вялікую злосць і сапраўдны сум я адчула, калі пабачыла фотаздымкі сябра ў бальніцы, куды ён трапіў пасля ўдзелу ў пратэстах. Але я б не называла асобных герояў, не акцэнтавала б увагу на пэўных людзях. Бо пратэст — гэта рух, і кожны ў ім можа граць сваю ролю».
«Жадаю ўсім беларусам, каб свабода перамагла і каб культура заўсёды мела сваё месца ў грамадстве. Вельмі важна быць часткай супольнасці, вельмі важна, каб адбываліся працэсы рэфлексіі пра рэчаіснасць. Нават у такія складаныя часы няварта забывацца на музыку. Музыка — заўжды добра, яна можа дапамагаць».
