Пры замове рамана «Рэвалюцыя» ў кнігарні knihi.by аўтар падпіша асобнік чытачам з рэгіёнаў. Са сталічнымі чытачамі Марціновіч паабяцаў сустрэцца пазней.
Вялебныя паны чытачы і яснавяльможныя пані чытачкі!
Тыя, хто жывуць па-за межамі Менску і маюць цікаўнасць да беларускай кнігі!
Праз каранавірус і «вы жа самі панімаеце», я не здольны прыехаць да вас на сустрэчу ў Берасце, Магілёў, Гомель і Гародню, не ставячы вас у небяспеку.
Але разумею, што шмат каму з вас хацелася б мець кнігу з аўтографам.
Калі ты бачыш перад сабой сцяну - апошняе, што варта рабіць - біцца ў яе галавой. Дык давайце прыгадаем запаветы Майстра Духмянасцяў («вы не людзі, вы – вада! Хапаеш вас, спрабуеш утрымаць, а вы праходзіце скрозь пальцы») і абыйдзем перашкоду.
Я абвяшчаю «анлайн аўтограф-сесію», якая, як белавежскі пармезан, сацыяльнае малако і глазураваны сырок з мядзведзікам, не мае аналагаў у свеце.
Мы дамовіліся з Алесем Яўдахам з knihi.by, што ад сёння і да пятніцы вы можаце замовіць сабе асобнік «Рэвалюцыі» з пазнакай «аўтограф».
У гэтую суботу я перастрэнуся з панам Алесем і падпішу кнігі, а з нядзелі ён пачне дасылаць іх вам.
Заказы пакуль прымаюцца толькі з рэгіёнаў, для Мінску мы сустрэнемся пазней і асобна.
Віктар Марціновіч, facebook.com
