Алесь Лютыч — беларускі музыка, фронтмэн гурта «Бяз Назвы» адмыслова для budzma.org падзяліўся ўласным топам улюбёных беларускіх песень.
1. Гурт Dali — Неба шэрае (piano version)
Гэты трэк вельмі круты, як на маю думку. Так прыгожа раскрываецца любоў да Беларусі, быццам параўноўваючы з каханнем да дзяўчыны ці жанчыны. Запамінальная ды кранальная мелодыя, чапляе за самае сэрца.
2. Уладзімір Мулявін — Чырвоная ружа
Працягваем тэму кахання (смяецца). Вечная беларуская класіка ад залатога складу «Песняроў» начале з Мулявіным. Жанчыны заўжды кіравалі сэрцамі мужчын, натхнялі на ўсялякія гераічныя і шалёныя подзвігі. Гэты трэк я памятаю яшчэ са свайго маленства!
3. Народны альбом — Простыя cловы
Лічу, што гэтую песню ўвогуле павінны ведаць усе беларусы, ад малога да старога, як калыханку, і спяваць яе ля вогнішча разам з сябрамі пад гітару, каб усе ведалі словы і спявалі разам. Песня беларускай душы.
4. Бачу ўпершыню — Менск вясной
Гэтую песню я і пачуў вясной, і, здаецца, яна адна з самых гітовых у хлопцаў з праекта «Бачу ўпершыню»! Мелодыя адразу залезла ў галаву і прычапілася да языка, хадзіў і часцяком проста напяваў прыпеў: «Менск вясной з табой напалам, мяняе колеры твой інстаграм...». Такія песні таксама ратуюць ад шэрасці дзён і дэпрэсіі, пераключаюць на нейкую пазітыўную хвалю.
Чытайце яшчэ: Усё можна перажыць, калі падабраць правільную песню: ТОП-5 беларускіх трэкаў ад Сяргея Башлыкевіча
Складана абіраць толькі 5 трэкаў, я прашу прабачэння ў тых артыстаў, каго не ўзгадаў, бо шмат крутых песень у беларускай музыцы.
5. N.R.M. — Фабрыка
Гэтая песня таксама заўжды актуальная, і ад гэтага сумна. Асабліва калі падае дождж, проста ўключыце гэтую песню, падыдзіце да вакна, і гледзячы далёка наперад, слухайце тэкст. Ажно дрыжыкі бяруць.
Як я і казаў раней, вартых увагі беларускіх выканаўцаў у разы больш, і калі каго забыў, прабачце.
P. S. Плэй-ліст дня ад Алеся Лютыча:
1. Анна Шаркунова — Дорога домой (вельмі круты трэк, і тэкст моцны і кранальны);
2. PomidorOFF — Спёка;
3. PomidorOFF — Дым;
4. ПАЛАЦ — Кола;
5. Akute — Сэрца;
6. Akute — Марнатраўны сын;
7. СПРАТ & friends — Беларускі рок-н-ролл;
8. Naviband — Гісторыя майго жыцця;
9. NAKA — Бяжы;
10. AVIAS — Хворыя марамі;
11. Дай Дарогу! — Семья уродов;
12. КРАМА — Падае дождж;
13. КРАМА — Бяжы хлопец;
14. RELIKT — Пляц Францыска;
15. Мутнае вока — Мутныя вочы.
Нагадаем, што з’явіўся бясплатны беларускі музычны сайт, на якім больш за 4000 песень, дзе можна паслухаць згаданыя трэкі, а да таго ж беларускія аўдыякнігі ды казкі.
