– Не ведаю, хто такі Віталь Рыжкоў, але яго верш мне падабаецца, – кажа міначка Анастасія Сяргееўна. Яна прызнаецца, што ў яе самой ёсць сын-падлетак. – Чую ад яго гэтае «адчапіся, мама» штодня, – смяецца жанчына.
Цягам апошняга месяца ў Магілёве з’явілася некалькі новых месцаў для сэлфi і фотасэтаў: сцены гарадскіх будынкаў упрыгожылі вершамі беларускіх паэтаў – Яўгеніі Янішчыц, Максіма Багдановіча, Ларысы Геніюш, Алеся Разанава, Віталя Рыжкова. Радкі, як у добрых кніжках, праілюстравалі беларускія мастакі Вольга Раманенка, Алеся Бяляева, Марыя Саперова, Алеся Пагадзіцкая, Вольга Азаранка і Юля Раткiна. Ідэя належыць выпускнікам школы «Цяпліца», арганізаванай Цэнтрам гарадскіх ініцыятыў (ЦГI).
 |
 |
 |
Магілёўцы не спяшаюцца праходзіць міма новых арт-аб’ектаў, спыняюцца, чытаюць і ўсміхаюцца, успамінаючы кожны сваё.
Прэзентацыя арт-праекта адбылася 22 жніўня на вуліцы Ленінскай. Тут, насупраць начнога клуба «Метро», 16-гадовая Юля Раткiна намалявала чорна-белыя крылы, на якіх быццам ляціць верш магілёўскага паэта Вiталя Рыжкова.
– Калі думалі, як лепш рэалізаваць праект, я прапанавала намаляваць крэйдай і абвесці фарбамі – і мне даверылі маляваць самы першы верш на праспекце Міра. Гэта былі радкі Яўгеніі Янішчыц «Ты пакліч мяне, пазаві …», – распавядае дзяўчына. Юля прызнаецца, что радкі Віталя Рыжкова ёй вельмі блізкія. – Усе пытаюць мяне, чаму гэтыя крылы рознага колеру – і адразу ж самі знаходзяць тлумачэнне. У першую чаргу я хацела малюнкам падкрэсліць тэкст. У вершы гаворыцца пра праблему пакаленняў: бацькі і дзеці – яны ж вельмі розныя, але пры гэтым яны і блізкія, таму што ўсё ж такі родныя людзі.
Прыехаў на прэзентацыю і сам Віталь Рыжкоў, які ўжо некалькі гадоў жыве ў Мінску:
– Маё любімае месца ў Магілёве – гэта абрыў на Дняпроўскiм бульвары. Там цудоўны від на вуліцу Падгорную, мост, Днепр, вельмі шырокi агляд. Гэтых пагоркаў і абшараў мне не хапае ў Мінску. Было б выдатна, калі б праект знайшоў свой працяг, можа быць, пайшоў у спальныя раёны. Напрыклад, варта выявіць вершы паэта Аляксея Пысіна дзе-небудзь на вуліцы яго імя, каб жыхары, можа быць, перасталі прасіць пераназваць яе.
У «Цэнтры гарадскіх ініцыятыў» яго падтрымліваюць і сцвярджаюць, што арт-праект яшчэ не завершаны, і беларускія вершы працягнуць з’яўляцца на магілёўскіх будынках.
– Сярод паэтаў, якіх мы выбіралі, ёсць і класікі і маладыя сучасныя аўтары, – распавядае кіраўнік Цэнтра гарадскіх ініцыятыў Юрый Стукалаў. – Наша мэта – папулярызацыя беларускай мовы, стварэнне новых арт-аб’ектаў у горадзе. Спадзяемся, што вершы на сценах не толькі зробяць горад больш прывабным, але і будуць натхняць гараджан.
Іра Тонева, Іна Мельнікава
