Выстава сучаснай скульптуры ў Гродне ўжо не адкрыецца. Прапанаваная форма далейшай працы экспазіцыі не задаволіла куратара і адміністрацыю галерэі, піша Hrodna.life.
Мяркуючы па каментары куратара Івана Арцімовіча, частку работ прапанавалі прыбраць, але ён з такой прапановай не пагадзіўся: «Я не лічу правільным выкрэсліваць з экспазіцыі будзь-каго з аўтараў, ці некаторыя іх працы па абсалютна надуманых прычынах, агучаных не прафесіяналамі. Я (думаю, як і многія з вас) хацеў бы, каб айчыннае мастацтва зберагала лепшыя свае дасягненні, напаўнялася цікавым зместам і новымі формамі, каб у нас быў СВОЙ уласны шлях і наша скульптура была рознай. У гэтай разнастайнасці я бачу ў будучыні магчымасць фарміравання ўласнай мовы, якая будзе адрозніваць нас ад астатняга свету».
Ён падзякаваў усім, хто дапамог выставе з’явіцца і цікавіўся яе лёсам. Куратар адзначыў, што яна праіснавала ўсяго чатыры гадзіны пасля адкрыцця.
У каментарах падтрымалі яго рашэнне і адзначылі, што яно годнае «сапраўднага куратара».
У галерэі — праблемы
Хто прапанаваў новую форму выставы і ў чым яна заключалася, даведацца пакуль не ўдалося. На наступным тыдні працы здымуць і яны вярнуцца да аўтараў.
Выстава закрылася пасля даносу?
Раней з просьбай закрыць выставу да ўладаў звярнулася актывістка Вольга Бондарава. На яе думку, некаторыя мастакі, якія ўдзельнічаюць у выставе, вядомыя антыдзяржаўнымі выказваннямі.
