Гурт Naka даў, быць можа, найлепшы свой канцэрт на прэзентацыі альбому «Довольна» ў клубе Re:Public.
Выступу Naka папярэднічаў дзіўны разагрэў. Пад рэдкія апладысменты на сцэну выйшаў правакатар Сяргей Пукст у вобразе шансон-спявака Георгія Дабро ды паведаміў, што ён шчаслівы выступіць упершыню ў гэтым горадзе. Вечар пачаўся з прысвячэння дамам — твору «Бальзаковский возраст» пад мінусоўку. Жарт ацанілі і артыста не засвісталі, наадварот, з кожнай новай песняй яго віталі яшчэ цяплей. Георгія Дабро і праўду можа чакаць поспех, калі ён перад сваімі канцэртамі возьмецца абтэлефаноўваць дырэктараў заводаў з прапановай выкупіць квіткі. Шызафрэнічны сэт Пукста скончыўся песняй «Америка», напісанай, паводле слоў выканаўцы, якраз з разлікам на тых, хто эміграваў. У гэтым сумбурным творы спявалася ў прыватнасці пра тое, як проста з’ехаць за акіян ды памяняць прозвішча «Дабро» на «Коэн». Маэстра на гэтым развітаўся і абяцаў вярнуцца. У прынцыпе, яго можна ставіць на разагрэў абсалютна на кожны канцэрт у Re:Public дзеля кантрасту з гуртамі, якія тут выступаюць.
На сцэне з’явіліся музыкі гурта Naka і пасля лютага ўступу пачалі знаёміць публіку з сваім новым альбомам «Довольна» — трэцім студыйным дыскам у гісторыі каманды. Пачалі з «Во чреве кита», песні, напісанай пад уражаннем ад рамана Оруэла «1984». У Насты Шпакоўскай наогул шмат песень, напісаных пад уплывам — «За минуту до взрыва» навеяная трагічным здарэннем у мінскім метро, «Всех забралі» — падзеямі 19.12.2010, «By You» — Чарнобыльскай катастрофай… Можа, з той прычыны, што многія песні напісаныя з нярадасных нагодаў, Наста і выйшла на сцэну ўся ў чорным. Спявачка паведаміла, што яна задаволеная тым, што людзі прыйшлі яе паслухаць (гледачоў у Re:Public сабралася сапраўды нямала), і выказала спадзеў, што ўсе ў сваю чаргу застануцца задаволенымі ад таго, што пачуюць. Напярэдадні канцэрту гурт звярнуўся да людзей з эмацыйным і даволі жорсткім пастом у сваім акаўнце у фэйсбуку: «Усе тыя, хто НЕ збіраецца на нашу прэзентацыю, НЕ ЗБІРАЙЦЕСЯ. Лепей схадзіць на Міхайлава ці Петрасяна. Лепей не ведаць, не думаць, не адчуваць! Не спыняйцеся весяліцца ані на секунду! Няхай жыве ZOMBY NATION!»
Сам альбом «Довольна» гурт выклаў у сеціва за пару тыдняў да канцэрту-прэзентацыі, таму слухачы паспелі ўжо добра пазнаёміцца з ім, пагатоў, шмат якія песні былі вядомыя і раней. Паводле рэакцыі публікі, пэўна, самымі ўлюбёнымі з новых з’яўляюцца «Клочьями» і «У баі» (шкада, што зноў без Вайцюшкевіча выкананая). Ну, а, пэўна, найбольш феерычна слухалася «Бяжы».
Па традыцыі на сваіх сольных канцэртах музыкі заклікалі да дабрачыннасці — на канцэрце збіралі грошы, каб набыць сланцы дзеткам з Бягомльскага інтэрнэту. «Веру, што жыццё наша зробіцца святлейшым, калі мы набудзем 107 параў сланцаў», — заявіла Шпакоўская пры канцы першага аддзялення. Другая частка канцэрту пачалася з самых трагічных нумароў у рэпертуары гурта — поруч ішлі «By You», «Пагоня», «За минуту до взрыва» і «Всех забрали». Былі і прэм’еры, упершыню прагучала песня «Я живу», якой наканавана ўвайсці ўжо ў будучы чацверты альбом. Менавіта яе разам з «Обочинами» і «Бяжы» Наста паўтарыла на біс.
Наогул жа Naka засведчыла сваім двухгадзінным выступам, што найлепш пачуваецца менавіта на вялікай сцэне, дзе ёсць дзе разгарнуцца: менавіта такога размаху ў іх музыка. Для гурта гэта быў надзвычай адказны канцэрт, тым больш, што выступалі яны абноўленым складам. Выпрабаванне музыкі прайшла з годнасцю і, магчыма, далі свой найлепшы на гэты момант канцэрт.
Мікалай Дубавіцкі, фота – Аляксандр Ждановіч