Новы сінгл “Беларусь – Украіна” ад беларуска-ўкраінскага тандэма гуртоў “Sciana” і “Роллікс” можна будзе пачуць у жывым выкананні ў мінскім клубе “Юла” (Сурганава, 26) 26 красавіка ў межах “Будзьма-туру”.
Хлопцы пазнаёміліся ў 2011 годзе на сцэне клуба ў Хмяльніцкім (Украіна), і знаёмства перарасло ў сяброўства. Аднойчы ўзнікла ідэя запісаць сумесны трэк, які займеў назву “Беларусь-Украіна”.
— Нам заўсёды прыемна наведваць суседнюю Украіну, — кажа Павел Прохараў. — У нас шмат сяброў па той бок мяжы, і ідэя стварэння песні ўзнікала даўно, а сустрэўшы хлопцаў з “Роллікс”, мы вырашылі запісаць песню пра нашае міжнароднае сяброўства. Мы ўпэўненыя, што для сапраўднага кахання і сяброўства не існуе межаў і кіламетраў! Мы ў гэта верым!
Паслухаць і спампаваць сумесную песню можна проста цяпер на сайце budzma.org:
А 26 красавіка ў клубе “Юла”, куды будзе вольны ўваход, можна будзе праспяваць новую песню разам з выканаўцамі.
— З сябрамі з гурта “Сцяна” мы прэзентуем сумесны трэк, які расказвае пра нашыя міжнародныя адносіны, — кажа Зміцер Ігнатаў (гурт “Роллікс”). — Апроч гэтага, мы пакажам праграму з новага альбома “Перотворися на зброю”. Вядома, гледачоў чакае шмат энергетыкі і драйву! Запрашаем усіх!
Украінскі гурт не дэбютуе на беларускай сцэне. Летась яны ўзялі ўдзел у рок-фэстах “БУГаРОК” (Берасце) і “Тры шурупы” (Горадня):
— У нас засталіся толькі прыемныя ўражанні! Было цёпла і драйвова. Нам надзвычай цікава было наведаць Беларусь — шмат чулі, шмат ведалі, але да гэтага не даводзілася тут бываць. З энтузіязмам і радасцю едзем да вас зноў і, спадзяюся, прыедзем і ў пяты, і ў дваццаты раз.
“Будзьма-тур” гуртоў:
26-га. Мінск, 19.00, клуб “Юла” – уваход вольны!
27-га. Горадня, міжнародны байк-фэст “Хавайся ў бульбу!”
28-га. Віцебск, бітлз-клуб “Чердачок”
29-га. Берасце, клуб СІТІ
Канцэрты арганізаваныя пры падтрымцы кампаніі “Будзьма беларусамі!”