У рамках праграмы Міжнароднай асацыяцыі музеяў “Museum for social hаrmonу” ў Дзяржаўным музеі гісторыі беларускай літаратуры 24 лютага а 17-й гадзіне адбудзецца творчая сустрэча “Святло хрысціянскай паэзіі”, з нагоды 70-годдзя з дня нараджэння ІНАКА МІКАЛАЯ, насельніка Жыровіцкага манастыра, вядомага беларускага паэта, публіцыста АЛЕГА БЕМБЕЛЯ (ЗЬНІЧА).
Алег Бембель – сын скульптараў – народнага мастака БССР Андрэя Ануфрыевіча Бембеля і Вольгі Анатольеўны Дзядок. Вучыўся ў Мінскім музычным вучылішчы, потым студэнт Белдзяржфілармоніі па класе фартэпіяна. 1971-74 гг. – аспірантура Інстытута філасофіі і права АН БССР. Адзін з аўтараў гісторыка-пазнавальнага тэлесцэнарыя “Архітэктурная спадчына Беларусі”. Як філосаф-публіцыст і паэт Алег Бембель склаўся на памежжы 70-80-х гг. Хрысціянская ідэя міласэрнасці, вымярэнне з’яў і падзей жыцця, учынкаў і памкненняў людзй у сістэме адвечных каштоўнасцей і з пункту гледжання вышэйшай справядлівасці, роздум над лёсам Беларусі і беларускага народа, пошук духоўных арыенціраў, якія маглі б забяспечыць народу ўратаванне, адвечная прага асобы да духоўнай і маральнай дасканаласці – вось тыя тэмы, якія заўсёды хвалявалі Алега Бембеля (Зьніча) і якія выразна развітыя ў паэтычнай творчасці. Вядомы Алег Бембель і як перакладчык на беларускую мову вершаў рускіх і латышскіх паэтаў.
Траецкае прадмесце, вул М.Багдановіча, 15.
