Усе эмоцыі, якія адчуваюць мужчыны ў працэсе галення — ад болю і непрыязнасці, засяроджанасці і спакою да радасці, што ўсё ззаду, а глянец ўжо наведзены, — прадстаўлены вядомымі беларускімі персонамі ў праекце Мікалая Батвінніка “Бег па лязе брытвы”, які распачаўся 18 сакавіка ў галерэі “Ў”.

Мікалай Батвіннік

Застацца “без маскі” пагадзіліся музыкі, літаратары, мастакі, мадэльеры, прадусары, бізнэсоўцы, кінарэжысёры, культуролагі, тэатралы, дызайнеры, рэстаратары і г.д.

Аляксандр Некрашэвіч (мастак)

Па словах Мікалая, “на фоне тых, каго грамадскасць ведае даўно (як Сяргея Міхалка), хацелася паказаць людзей, якіх ведаюць менш. Напрыклад, Юрыя Шыфа, які бярэ першыя месцы на конкурсах дызайну ў Іспаніі і Амерыцы”.

“Я хацеў паказаць, што ў Беларусі ёсць мужчыны”, — сказаў аўтар, адкрываючы імпрэзу.

Прычым, як расказаў Мікалай, спіс удзельнікаў складаўся вельмі доўга, але ніхто не адмовіўся.

Камера замяніла мадэлям люстэрка, а інструментамі паслужылі не толькі квачы, аднаразовыя станкі, нажніцы, але і небяспечныя брытвы, што ўжо зрабіліся рарытэтамі, і нават зброевы ствол.

Трыццаць пяць партрэтаў не пакінуць абыякавымі не толькі жанчын, але і мужчын, якія не па чутках ведаюць, што такое галіць твар. У адрозненне ад прадстаўніц слабога полу, якім відавочна цікава разглядаць асобы смелых, знятыя ў стылі Esquire, мужчыны рэагуюць на ўбачанае зусім неадназначна: ад адкрытай радасці да “культурнага шоку”.

“Хочацца сказаць, што праект гэты не скончаны, ён будзе працягвацца. Я думаю зрабіць праект з жанчынамі (make up) і прадставіць яго ў наступным годзе. Час на здымкі ёсць, але, думаю, на гэты праект, са зразумелых прычынаў, пойдзе больш часу”, — раскрыў аўтар невялікі сакрэт. Будзем чакаць.