15.04.2013 | Конкурсы Навіны "Будзьма!"

Рэалізуй свой культурніцкі праект разам з “Будзьма беларусамі!”

Грамадская кампанія “Будзьма беларусамі!” абвяшчае конкурс праектных ідэй, накіраваных на развіццё культурнага жыцця ў Беларусі.

“Будзьма беларусамі!” запрашае да ўдзелу ў конкурсе тых, каму неабыякавае паляпшэнне культурніцкай прасторы свайго горада/рэгіёна.

Калі ў Вас ёсць ідэя, якая:

спрыяе развіццю культуры (тут і далей слова “культура” разумеецца ў шырокім сэнсе);

– ахоплівае шырокае кола людзей;

– спрыяе ўзнікненню іншых творчых ідэй;

– натхняе іншых на актыўнасць у сферы культуры;

– дапамагае з’яўленню новых партнёрстваў у сферы культуры і ў сумежных сферах — бізнесе, адукацыі, турызме, ахове навакольнага асяроддзя, мясцовым і рэгіянальным развіцці;

– павялічвае цікаўнасць грамадзян да культуры;

– робіць рэгіянальную культуру больш разнастайнай,

дасылайце прэзентацыю свайго праекта, а таксама інфармацыю пра ініцыятара на скрыню: razam@budzma.org з пазнакай “На конкурс праектаў”.

У прэзентацыі павінны быць:

– імёны і прозвішчы аўтараў/ініцыятараў праекта, кантакты;

– назва і сутнасць ідэі (праект, стратэгія развіцця і г.д.);

– мэта і мэтавыя аўдыторыі (чаму і каму гэты праект неабходны);

– чаму ідэя ўнікальная і (ці) актуальная;

– калі і дзе ідэя мусіць рэалізавацца;

– якія рэсурсы вы ўжо маеце і якія — шукаеце (каманда, партнёры, бюджэт).

Хто можа ўдзельнічаць: фізічныя асобы, грамадскія ініцыятывы (калектывы), любыя непалітычныя арганізацыі з рэгіёнаў і Мінска.

Усе прапановы будуць разгледжаныя экспертнай камісіяй.

Кампанія “Будзьма беларусамі!падтрымае адабраныя ідэі, а менавіта :

– дасць магчымасць прасоўваць ідэі на сваім інтэрнэт-партале www.budzma.org;

– паспрыяе асвятленню ў іншых сродках масавай інфармацыі;

– прадставіць выбітныя ідэі на “Кірмашы праектаў” з удзелам іншых дзеячаў культуры ў адпаведным рэгіёне дзеля пашырэння кола аднадумцаў;

– дапаможа прыцягнуць фінансавых партнёраў для рэалізацыі праекта.

Што важна: сябры камісіі будуць ацэньваць якасць праекта, яго культурную і грамадскую значнасць, адпаведнасць мэтавай аўдыторыі.

Падтрыманыя ідэі мусяць быць рэалізаваныя ў любы час у перыяд з 01.06.2013 г. па 31.05.2014 г.

Прыём ідэяў да: 15 мая 2013 г.

Вынікі конкурсу будуць абвешчаныя 31 мая на сайце budzma.org

 

 

Ніна Шыдлоўская: Шаноўныя сябры! Трошкі тлумачэнняў:

На конкурс не прымаюцца выключна відовішчныя, забаўляльныя праекты. Сама назва “Конкурс ідэяў” кажа пра тое, што прыярытэт – цікавым рашэнням, якія дапамогуць культурніцкаму жыццю ў розных, вялікіх і маленькіх, “кропках” Беларусі стаць яшчэ больш культурніцкім. Эфект ад іх рэалізацыі – для як мага шырэйшага кола людзей, праблематыка – грамадска-культурная.

Асабліва чакаем на праекты, у ходзе падрыхтоўкі і рэалізацыі якіх будзе відавочнае пашырэнне камунікацыі розных “групаў” – ад ініцыятараў да дзяржаўных установаў (тое, што публіцы на выніку можа ўжо і не быць заўважна, але неабходна і важна для самой падрыхтоўкі). Бо менавіта людзі, іх патэнцыял і разуменне важнасці сваёй працы вызначае якасць культуры, якую мы маем і можам мець.

Усім поспехаў! І разам – мы зробім культурніцкае жыццё цікавей!


10 Каментаў у “Рэалізуй свой культурніцкі праект разам з “Будзьма беларусамі!””

  1. symona says:

    Добры дзень шаноўныя! У мяне ёсць ідэя, якую можна было б назваць “Аднаўленне гістарычнай памяці грамадсва” праз стварэнне невялікіх і змястоўных тэкстаў па нашай гісторыі і праблемах. Памер гэтага тэкста адзін звычайны ліст.Я ўжо зрабіла 4 тэмы і збіраюся зрабіць яшчэ столькі ж. Тэмы гэтыя “Вайна 1812г.Трагедыя Беларусі”, “Як дзялілі Ьеларусь у ХХст.”, “Што мне дае беларуская мова”, “Наша моўная праблема, альбо чаму беларусы і сёння не гавораць па беларуску”(гістарычны аспект).Пры вялікай колькасці раздруковак распаўсюдзіць можна (праз нашыя сеці) праз паштовыя скрыні. Тэксты, калі трэба дадам.Людміла Літвінава.г.Менск.

    • Добры дзень, паважаная Людміла!
      Напішыце, калі ласка, падрабязней пра сваю ідэю і дашліце нам у выглядзе тэкставага файла ці прэзентацыі. Не забудзьцеся даць базавае апісанне праекта (напрыклад, серыя відэа-ролікаў на тэму “ХХХ” ці цыкл адукацыйных сустрэч) і напісаць пра актульнасць і важнасць праекта для пэўных мэтавых груп.
      Правільна аформленная заяўка, з якой будзе бачна, што сам аўтар разумее, што за праект ён распачынае, якія задачы праект вырашае і для каго ён патрэбны, мае больш шансаў на чаканыя станоўчыя вынікі :)
      Поспехаў!

  2. Антон says:

    Здравствуйте. Заявочку обязательно на белорусском оформлять? Хочу сделать в Минске Тахелес :)
    «Тахелес» — самы вядомы берлінскі сквот, арт-цэнтр (артхаўс), размяшчаецца на рагу Араніенбургерштрасэ і Фрыдрыхштрасэ ў цэнтры Берліна.
    http://officeart.by/2013/04/archevolution-officeart-tacheles/

    • Добры дзень, Антон!

      Так, пажадана, канешне, на беларускай мове, але сама ідэя больш важная. Па-руску мы таксама разумеем.

  3. Алесь says:

    Хрыстос уваскрос!
    Уваскрэсне й наша культура!

  4. Ганна says:

    Добры дзень! Мы – гэта грамадскае (незарэгістраванае) аб’яднанне “Вільняр”, якое дзейнічае на Астравеччыне, маем намер у ліпені на беразе возера Кайміна зладзіць свята, прысвечанае 150 гадавіне паўстання Каліноўскага. Хочам паставіць невялічкі спектакль на гэтую тэму (наш сцэнарый напісаны на мясцовым гістарычным матэрыяле), запрасіць бардаў, паэтаў, мастакоў (хай пленэраць!). Ёсць прапанова запрасіць і рыцараў, але гэта пакуль спрэчны момант, паколькі іх прысутнасць выбіваецца з агульнага кантэксту.
    Пэўны вопыт у правядзенні пленэраў у нас ёсць (ладзілі яго у Лакцянах,Варнянах і Дайлідках). У нас малявалі Пушкін, Цыркуноў,Кастусь Качкан, Алесь Суша, Харэўскі, Алег Аблажэй і многія іншыя. У мінулым годзе мы зладзілі (там жа – на Кайміне) паэтычны слэм, з удзелам вядучых беларускіх паэтаў-слэмістаў.
    Што тычыцца музычнага боку імпрэзы, то Вальжына Цярэшчанка, Андрэй Мельнікаў, Алег Мізула, Таццяна Матафонава і іншыя – нашы частыя госці.
    Словам, працуем над сваёй задумкай. Што патрэбна? Фінансавая дапамога. Гэта – у першую чаргу. Не лішняй была б і нейкая метадычная падтрымка. А яшчэ – рэклама падзеі, бо хочацца зладзіць грунтоўнае свята – юбілей жа вунь які грандыёзны.
    З павагай. Ганна

    • Вітаем Вас, паважаная Ганна!
      Дзякуй за ідэю і цікаўнасць да конкурса! Але мы не прымаем заяўкі па праектах, дасланыя ў выглядзе каментароў :)
      Калі ласка, апішыце свой праект больш падрабязна па прапанаваным намі вышэй плане, адзначце суму бюджэту і асноўныя пазіцыі ў ім, і дашліце на скрыню razam@budzma.org.
      Жадаем поспехаў!

  5. Натальля says:

    А ці можна азнаёміцца з вынікамі конкурсу?

  6. Алена says:

    І мне таксама цікава.))

Дадаць каментар

*

*

Апошнія навіны

Яндекс.Метрика