18 ліпеня 2010 г. адбылося падарожжа, наладжанае Таварыствам аховы помнікаў у межах агульнанацыянальнай кампаніі “Будзьма беларусамі” па левабярэжнай часты Гарадзенскага раёна. Гэтае падарожжа можна з поўным правам назваць вандроўкай па “гарачых” кропках. Бо практычна ва ўсіх пунктах наведвання сустракала прыхільнікаў помнікаў гісторыі і культуры гарачыня звыш чым 35 градусаў.
У казематах Гарадзенскай крэпасці
Нягледзячы на спёку група з энтузіязмам агледзіла трохкамерны шлюз побач з в. Нямнова на Аўгустоўскім канале, нават дапамагла адшлюзаваць турыстаў-байдарачнікаў, нведала музей унікальнай гідратэхнічнай сістэмы.
Сапоцкін. Касцёл
У Сапоцкіне, апошнім аплоце грэка-каталіцызма на сучасных беларускіх землях (унія тут была скасавана толькі ў 70-х гг. 19 ст.), пазнаёміліся з касцёлам, наведалі магілу генерала Юзафа Альшыны-Вільчынскага і мемарыял у памяць афіцэраў, падафіцэраў Войска пальскага, Корпуса аховы памежжа і паліцыі, якія загінулі пры абароне Горадні і ўвогуле ў баях з чырвоным войскам пад час савецкай агрэсіі ў верасні 1939 г.
Вялікія ўражанні пакінуў палац у Свяцку, фартыфікацыя Гарадзенскай крэпасці, радзіма эксэленцыі, мітрапаліта, арцыбіскупа Мінска-Магілёўскага Тадэуша Кандрусевіча – Адэльск, і велічныя помніка ў Індуры.
Індура. Ля касцёла
У Квасоўцы падарожнікі пазнаёміліся з пробашчам мясцовага касцёла – ксяндзом Янам, які шчыра і адкрыта падзяліўся праблемамі падтрымання касцёльнага будынку ў належным стане і запрасіў прадстаўнікоў Таварыства на працоўную сустрэчу ў жніўні месяцы.
На першым фота – Свяцк. Палац
