28 чэрвеня а 16 гадзіне на Вайсковых могілках Дзяржаўны літаратурны музей Янкі Купалы ладзіць Жальбіны з нагоды 79-й гадавіны смерці народнага паэта Беларусі Янкі Купалы.
У музеі Песняра захоўваецца спецпаведамленне, дзе пазначана, што 28 чэрвеня 1942 года ў 22 гадзіны 30 хвілін “упаў у лесвічны пралёт і разбіўся насмерць народны паэт Беларусі Янка Купала”. Пахаванне адбылося 1 ліпеня 1942 года ў Маскве. На Беларусь паэт вярнуўся толькі ў 1962 годзе – яго прах перазахавалі на Вайсковых могілках у Мінску.
Сучаснікі Янкі Купалы, якім пашчасціла сустракацца і сябраваць з паэтам, захавалі пра яго самую светлую памяць. Для ўсіх наступных пакаленняў жыве Слова Песняра, поўнае любові да Бацькаўшчыны і беларускага народа.
У знак удзячнай памяці паэту, які ахвярна служыў Радзіме, запрашаем запаліць свечку і ўскласці кветкі на магілу Янкі Купалы падчас жалобнага набажэнства.
