Сустрэча старшыні суполкі “Пагоня” Аляксея Марачкіна з навучэнцамі маладзечанскай гімназіі-каледжу мастацтваў адбылася сёння ў музычнай вучэльні імя Агінскага. Яна была прымеркаваная да адкрыцця мастацкай выставы “Вечны вандроўнік”, прысвечанай 120-гадоваму юбілею выдатнага мастака, паэта і фалькларыста Язэпа Драздовіча. Сустрэча праводзілася ў межах кампаніі “Будзьма!”.
Галоўная мэта сустрэчы – азнаёміць маладых маладзечанцаў з творамі беларускіх мастакоў, напісаных у гонар Язэпа Драздовіча. Акрамя Аляксея Марачкіна, перад маладымі мастакамі выступалі і іншыя вядомыя творцы: Кастусь Харашэвіч, Рыгор Мяжуеў, Мікола Аўчыннікаў. Яны распавялі пра ролю творчасці Язэпа Драздовіча ў айчыннай гісторыі і мастацтве, а Аляксей Марачкін дэталёва апісаў кожны твор, які знаходзіўся ў прадстаўленай экспазіцыі.
Сярод карцінаў, прысвечаных Язэпу Драздовічу, былі творы самога Аляксея Марачкіна, ці, як ён падпісваецца, Аляксея Мары, яго сына Ігара Марачкіна, Яўгена Шатохіна, Міколы Аўчыннікава.
Падчас імпрэзы Аляксеем Марачкіным было падкрэслена, што сустрэча і мастацкая экспазіцыя праводзяцца ў межах кампаніі “Будзьма”.
Як зазначыў Мікола Аўчыннікаў, які акрамя мастацкай дзейнасці займаецца і адукацыйнай, выкладаючы ў мастацкім каледжы, гэты год у яго навучальнай установе абвешчаны годам Язэпа Драздовіча. На пачатку наступнага году распачнецца вучнёўская выстава ў гонар Драздовіча. На ёй будуць прадстаўленыя творы, напісаныя пачынаючымі мастакамі з Маладзечна.
