Гэтымі выходнымі, 15 і 16 кастрычніка, філіял Веткаўскага музея ладзіць процьму файных імпрэз! Будзе і спеўны сход, і танцы, і кінасеанс, і майстар-клас!
Дата: 15 і 16 кастрычніка
Месца: філіял Веткаўскага музея, плошча Леніна, 4а, Гомель
У суботу, 15 кастрычніка, у 13.30 завітвайце на супольныя спеўкі «Школкі традыцыйных спеваў» вывучыць новыя абрадавыя песні да будучай вясельнай вечарыны.
На такіх занятках няма гледачоў — усе ўдзельнікі, усе спяваюць разам. і няважна, ці ўмееце вы спяваць, ці ведаеце песні — тут радыя ўсім!
Уваход вольны!
Пасля спевак, а 15-й — кінаклуб «ЭТНАфільМЫ», дзе будуць пад гарбату глядзець, а пасля і абмяркоўваць фільм «Урга: тэрыторыя кахання».
У аснове сюжэта анекдатычная жыццёвая сітуацыя пра тое, як стэпавы мангол паехаў у горад за сродкамі кантрацэпцыі, бо па законе ён не меў права мець больш за трох дзяцей, але патраціў грошы на зусім іншыя рэчы.
Квіток — 3 рублі.
У нядзелю зранку, 16 кастрычніка аб 11-й, завітайце на майстар-клас па вырабе вясельных вяночкаў.
Усе разам будуць рабіць вяночак для будучай вясельнай этнавечарыны. Вы даведаецеся, як зрабіць сапраўдны вясельны вянок.
А калі ёсць жаданне пайсці дадому з уласным вяночкам — бярыце з сабой абадок (абруч) для галавы (той, што з цвёрдым каркасам).
Дазнаецеся не толькі тэхналогію вырабу, але і мноства цікавостак пра традыцыйнае вяселле на Гомельшчыне.
На майстар-клас патрэбна загаддзя запісацца па нумары +375(232)509698.
Кошт удзелу — 3 рублі.
Ну а ў 14.00 «Школка бытавога танца» распачынае новы танцавальны сезон! Будуць танчыць-танчыць-танчыць!
У працэсе вы дазнаецеся:
— што, як і чаму менавіта так робіцца ў беларускім народным танцы;
— у чым адрозненні народна-сцэнічнага танца, што можна пабачыць на сцэне ў выкананні артыстаў, ад народна-бытавога, што танчылі людзі ў паўсядзённым жыцці.
І, канешне, навучыцеся асноўным рухам, без якіх танец — не танец.
Уваход вольны! (наступныя танцавальныя заняткі будуць ужо платныя — але недарагія).
