Зміцер Наркевіч — бас-гітарыст гурта Relikt адмыслова для budzma.org падзяліўся сваім топам беларускіх песень розных часоў.
Фота: Кірыл Чычэліс
1. ULIS — «Цягнік на Нясвіж»
ЗН: У гурта ULIS шчыльная канцэнтрацыя класных песень. Мы нават ўзялі дзве для нашага новага альбома «Byli, Jość, Budziem». Гэта кампазіцыя вяртае мяне ў дзяцінства, хаця тэкст яе зусім не дзіцячы, ды я пачуў яе ўжо ў сталым узросце. Нясвіж — гэта любы мне горад, дзе я правёў значную частку жыцця, там жыве шмат сваякоў, сяброў дзяцінства. Ён вельмі змяніўся з тых часоў, калі я там жыў. Але дагэтуль там няма чыгункі. Мне падаецца, што гэта ў нейкім сэнсе добра, бо лепш ёй заставацца вобразам у песні, каб не разбураць восеньскую цішыню ў парку ля палаца гукамі цягнікоў.
2. Народны альбом — «Простыя словы»
ЗН: Для мяне гонар, што быў хоць крышачку, але асабіста знаёмы з Міхалам Анемпадыставым. Яго добрае стаўленне да творчасці Relikt — каштоўная высокая адзнака для нас. Ніколі не будзе лішнім узгадаць асобу спадара Міхала ды хаця б гэту песню на яго верш. «Простыя словы» яднаюць, робяць на душы цёпла і ўтульна. Дзякуй, за творчасць, даследаванні, цікавыя размовы, парады. Я вельмі шкадую, што больш не будзе сустрэч.
3. Крама — «Падае дождж»
ЗН: Спачатку ты падлеткам набываеш касеты гурта «Крама» ды ходзіш на яго канцэрты. Потым працуеш час да часу на выступах «Крамы» ў «Графіці» ды знаёмішся з музыкамі. Пасля выступаеш з імі на адной сцэне на фэстах, бярэш колькі ўрокаў бас-гітары ў спадара Ванькевіча. Зараз яшчэ зрабілі два знакавых каверы на «Бонду», што дала пазней пачатак «Краме». Усіх падзей, шчыра кажучу, не ўзгадаю і баюся, што забыўся на нешта важнае. Увогуле мне падабаецца, як лёс зводзіць з удзельнікамі гурта.
Песня «Падае дождж» — адна з улюблёных з альбома «Хавайся ў бульбу». На ёй вакал Ігара Варашкевіча неяк асабліва чапляе сваім лірычным тэмбрам, мелодыяй. Класны гурт і я вельмі рады, што ён зараз існуе ды выпускае альбомы.
4. Троіца — «Чамбор»
ЗН: Мне даспадобы такая трансфармацыя народнай песні, як і ў іншых творах Троіцы. Ствараецца медытатыўнасць, якая на нейкім містычным узроўні звязвае з нашым мінулым, фальклорам, краявідамі. Гармонія ў кожным інструменце, у кожнай дарожцы вакалу — нібыта зачароўваешся гукамі беларускай прыроды.
5. Песняры — «Малітва»
ЗН: Не магу слухаць яе без эмоцый. Геніяльны твор, які не кране толькі абыякавага.
Чытайце яшчэ:
Relikt выдаў альбом-падарожжа ў залатыя часы беларускага рока (аўдыё)
Бубнач гурта Relikt Алесь Дземідзенка: «Мы — беларусы — такія як ёсць. Іншых не будзе. Трэба лаяльней ставіцца адно да аднаго»
