Згуртаванне «Бацькаўшчына» ў межах дзейнасці кампаніі «Будзьма беларусамі!» працягвае аказваць дапамогу Чэрвеньскаму дому-інтэрнату для дзяцей-інвалідаў і маладых інвалідаў з асаблівасцямі псіхафізічнага развіцця. Сёння ў гэтую ўстанову мы перадалі сродкі індывідуальнай абароны, а менавіта:
— 400 аднаразовых медыцынскіх халатаў;
— 400 пар бахілаў;
— 400 пар нарукаўнікаў;
— 900 пар аднаразовых пальчатак.
«Не сакрэт, што жыхары дамоў-інтэрнатаў — адна з найбольш уразлівых групаў насельніцтва падчас пандэміі, хоць пра гэта асабліва не гавораць на дзяржаўным узроўні. Там пастаянна знаходзіцца шмат людзей, і няма магчымасці трымаць сацыяльную дыстанцыю. Персаналу такіх установаў надзвычай патрэбныя сродкі індывідуальнай абароны, для іх гэта цяпер фактычна пытанне выжывання. Таму мы — грамадская кампанія «Будзьма беларусамі!» і Згуртаванне беларусаў свету «Бацькаўшчына» — стараемся аказаць дапамогу наколькі гэта магчыма», — гаворыць Ніна Шыдлоўская, каардынатар ГКК «Будзьма беларусамі!», старшыня Рады ЗБС «Бацькаўшчына», сузаснавальніца крамы budzma-krama.by.
Ніна Шыдлоўская
«Мы даўно сябруем з Чэрвеньскім домам-інтэрнатам, таму і захваляваліся, як яны спраўляюцца ва ўмовах пандэміі, — працягвае спадарыня Шыдлоўская. — Даведаліся, што ёсць захварэлыя — і дзеткі, і персанал. Таму ўжо другі раз перадаём ім сродкі індывідуальнай абароны: тыдзень таму завезлі 1000 аднаразовых масак, а цяпер змаглі дапамагчы трошкі болей. Але і гэтага яшчэ недастаткова! Таму мы працягваем у краме budzma-krama.by дабрачынную акцыю «Дапаможам разам» у падтрымку Чэрвеньскага дома-інтэрната. Але, на жаль, дапамога патрэбная не толькі Чэрвеньскаму дому-інтэрнату. Такіх установаў па ўсёй Беларусі нямала, і мы шчыра спадзяемся, што знойдзецца шмат неабыякавых людзей, якія падтрымаюць нашу ініцыятыву і па меры сваіх магчымасцяў акажуць дапамогу. І тут ад кожнага шмат не трэба, галоўнае — толькі жаданне дапамагаць!»
Нагадаем, што ў межах дабрачыннай акцыі «Дапаможам разам», абвешчанай крамай беларускіх адметнасцяў budzma-krama.by, 50% сродкаў ад усёй прададзенай з 4 па 31 мая прадукцыі будуць пералічаныя Чэрвеньскаму дому-інтэрнату для дзяцей-інвалідаў і маладых інвалідаў з асаблівасцямі псіхафізічнага развіцця.
Заклікаем усіх неабыякавых далучыцца да нашай ініцыятывы і аказаць дапамогу дамам-інтэрнатам і падобным установам. Дапамагчы можна наступнымі спосабамі:
— перадаць аднаразовыя касцюмы, маскі і іншыя неабходныя сродкі абароны непасрэдна ў дамы-інтэрнаты;
— пералічыць грошы праз дабрачынны фонд «Добра тут», які займаецца падтрымкай дамоў-інтэрнатаў для людзей з асаблівасцямі псіхафізічнага развіцця;
— далучыцца да дабрачыннай акцыі «Дапаможам разам» ад крамы budzma-krama.by, а менавіта набыць да 31 мая што-небудзь прыгожае і адметнае ў нашай краме і такім чынам падтрымаць тых, хто не можа дапамагчы сабе сам.
Будзьма неабыякавымі! Дапаможам разам тым, каму гэта цяпер сапраўды патрэбна!
Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!
