50-гадовы юбілей Анатоля Сыса адзначылі на радзіме паэта ў вёсцы Гарошкаў святам паэзіі “Дух – гэта, людзі, Я!” 31 кастрычніка.
Днём марозным і трошку сонечным на Гарошкаўскіх могілках адбылося ўскладанне кветак да помніка паэту. Там жа запалілі свечкі. Была хвіліна маўчання.
Пісьменнік Алесь Пашкевіч: “Калі на Беларусі памірае паэт, пра яго павінныя казаць не людзі, а яго вершы“.
Анатоль Сыс нарадзіўся 26 кастрычніка 1959 году ў вёсцы Гарошкаў Рэчыцкага раёну Гомельскай вобласці, а памёр 4 траўня 2005 году.
Каб успомніць паэта, у Гарошкаў прыехалі літаратары, барды, мастакі, сярод якіх былі сябры, землякі, прыхільнікі творчасці Анатоля Сыса: Міхась Скобла, Леанід Дранько-Майсюк, Алесь Камоцкі, Кася Камоцкая, Барыс Пятровіч і шмат іншых.
Пасля наведвання могілак людзі прыйшлі да хаты, дзе жыў Анатоль Сыс. На сцяне, пад белай прасцінкай, хавалася шыльда ў гонар паэта. Яе неўзабаве адкрылі Эдуард Акунін і Павел Лук (аўтар шыльды).
Павел Лук адкрывае шыльду на гонар паэта
На падворку распачаліся выступы. У гэты дзень на Палессі выпаў першы снег, а на вуліцы нават удзень замярзала вада. Таму праграму свята давялося крыху скараціць. Шмат было прамоваў і вершаў Сысу ад аўтараў. Гэтыя вершы ўвайшлі ў зборнік “Ягамосьць” – кнігу паэтычных прысвячэнняў, якую прэзентавалі тады ж разам са зборнікам паэзіі “Алаіза” Анатоля Сыса. У кнізе “Ягамосьць” – творы сарака паэтаў.
Анатоль Вярцінскі:
— Анатоль параўноўваў сваю паэзію з рэлігіяй. Ён таксама ставіў на адну дошку такія паняткі, як паэзія і Беларусь. Яго беларускасць і патрыятызм былі зусім не дэманстрацыйныя і выказаныя не толькі ў вершах, абсалютна шчырыя, памножаныя на яго адметнасць як чалавека.
Са словаў Уладзіміра Някляева, Анатоль Сыс вельмі хацеў, каб яго вершы спявалі.
Уладзімір Някляеў
Кася Камоцкая сьпявае на вершы Анатоля Сыса.
Колісь, можа, ў жарт, Сыс называў сябе Ісысам. Так, калі ён ставіўся да паэзіі, як да рэлігіі, то сёння яго можна назваць святым духам гэтае паэзіі, прозвішча яго можа на роўных стаяць побач з прозвішчамі Купалы і Багдановіча.
Пры падтрымцы грамадскай кампаніі “Будзьма беларусамі!”
Тэгі: Гарошкаў
