Трэці фестываль беларускамоўнай рэкламы і камунікацыі AD.NAK! ладзіць прэзентацыю у Беларускім дзяржаўным эканамічным універсітэце. Яна адбудзецца 18 траўня а 15-й гадзіне у 339-й аўдыторыі 3-га навучальнага корпусу ўніверсітэта (Партызанскі праспект, 26).
У прэзентацыі прымуць удзел арганізатары, партнёры і сябры фестывалю. Падчас прэзентацыі можна будзе дазнацца больш цікавай інфармацыі пра сам фестываль, убачыць працы пераможцаў мінулых фестываляў, задаць самыя вострыя і нечаканыя пытанні выступоўцам, а таксама ўпэўніцца, што ўдзел у фестывалі абсалютна бясплатны і свабодны, а значыць, кожны зможа падаць сваю працу і стаць пераможцам альбо прызёрам.
Сёлета Фестываль AD.NAK! супольна з адукацыйным праектам “BIGIN” ініцыяваў адмысловы конкурс “Alma Матуля”, разлічаны на студэнтаў. Згодна з яго ўмовамі, маладыя людзі павінныя скласці канцэпцыю прасоўвання сваіх ВНУ пры дапамозе BTL-сродкаў камунікацыі (у тым ліку праз сацыяльныя сеткі, вірусную рэкламу, постэры, сайты універсітэтаў). Прапанаваная канцэпцыя павінна быць рэалізуемай і малазатратнай. Праекты могуць распрацоўвацца індывідуальна або ў камандзе (максімальна 2 чалавека ў камандзе).
Конкурс ужо падтрымалі вельмі паважаныя і ўплывовыя партнёры – Бізнес-школа ІПМ і спецыялізаваны партал RABOTA.TUT.BY. Яны ўганаруюць найбольш дастойныя працы конкурсу каштоўнымі і карыснымі прызамі.
Месца і час сустрэчы: Беларускі дзяржаўны эканамічны ўніверсітэт, 3 навучальны корпус (Партызанскі праспект, 26), аўдыторыя №339. Пачатак а 15-й гадзіне. Зарэгістравацца на сустрэчу можна ТУТ.
Нагадаем, што Фестываль беларускамоўнай рэкламы і камунікацыі AD.NAK! у трэці раз расчыніў свае дзверы для ўдзельнікаў конкурснай праграмы 27 красавіка і пачаў прыём працаў да ўдзелу ў намінацыях і конкурсах фестывалю.
Дэдлайн прыёма працаў – 11 чэрвеня. Удзел у фестывалі – БЯСПЛАТНЫ.
Кульмінацыяй фестывалю стане Вялікі фестывальны дзень, які пройдзе 5 ліпеня. Адукацыйная праграма фестывалю будзе складацца з серыі майстар-класаў беларускіх і замежных прафесіяналаў у галіне рэкламы, а завершыцца дзень цырымоніяй узнагароджання пераможцаў.
Па дадатковую інфармацыю звяртайцеся ў аргкамітэт Фестывалю AD.NAK!:
Тэл.: (29) 177-0121, 755-1434, (25) 978-9787, E-mail: [email protected].
