Выстава «Графічныя афарызмы Міхаіла Лісоўскага» ў Мінску

У аўторак, 17 сакавіка, у музеі гісторыі беларускай літаратуры адкрываецца выстава «Графічныя афарызмы Міхаіла Лісоўскага», прысвечаная 95-годдзю з дня нараджэння мастака.

Творчасць Міхаіла Якаўлевіча Лісоўскага вызначаецца разнастайнасцю: ён працаваў ў бытавым, пейзажным і партрэтным жанрах, займаўся станкавай графікай.

Аднак сапраўдным яго пакліканнем стаў сяброўскі шарж, героямі якога былі, у тым ліку, вядомыя беларускія літаратары, з якімі мастак быў асабіста знаёмы.

Дзякуючы Міхаілу Лісоўскаму шарж увайшоў у беларускую мастацкую практыку і заняў годнае месца.

Ствараючы партрэт, мастак старанна імкнуўся паглыбіцца ва ўнутраны свет чалавека. Ён ствараў вельмі дакладныя і пазнавальныя выявы, пазбягаючы грубай або павярхоўнай сатыры, таму ніколі не нажываў ворагаў. У гэтым і адметнасць гумару Лісоўскага — вясёлага, добразычлівага, такога, што не імкнецца высмеяць ці зачапіць «за жывое».

Выстава створана сумесна з Беларускім дзяржаўным архівам-музеем літаратуры і мастацтва, у фондах якой захоўваецца каштоўная калекцыя шаржаў мастака.

Значная частка гэтай калекцыі прадстаўлена на выставе ў выглядзе павялічаных лічбавых копій.

Наведвальнікі змогуць убачыць своеасаблівую «галерэю» беларускіх літаратараў ХХ стагоддзя — у дасціпных, трапных і вельмі пазнавальных вобразах, створаных мастаком.

Гэтыя працы не толькі выклікаюць усмешку, але і раскрываюць атмасферу літаратурнага асяроддзя свайго часу

Куратарка — загадчыца навукова-экспазіцыйнага аддзела Ірына Князева.

Працуе выстава да канца года.

Уваход вольны.