Фестываль Беларускай Бардаўскай і Аўтарскай Песні «Бардаўская восень 2025» сёлета святкуе 30-гадовы юбілей. Адметнасць юбілейнай эдыцыі фэсту — вяртанне конкурсу выканаўцаў. Упершыню ў гісторыі фестывалю абіраць пераможцу конкурсу будзе аўдыторыя праз сацыяльныя сеткі.

Хто можа ўзяць удзел

Фестываль шукае новыя імёны ў беларускай аўтарскай песні і запрашае да ўдзелу ў конкурсе беларусаў і беларусак, якія:

• пішуць і выконваюць свае песні па-беларуску, 

• маюць мінімум 4 аўтарскія творы, 

• жывуць у адной з краін Еўропы.

Умовы ўдзелу

Каб узяць удзел, трэба да 30 верасня запоўніць анлайн-форму і даслаць запіс адной уласнай песні на беларускай мове.

Конкурс адбудзецца анлайн праз адкрытае галасаванне ў сацсетках Tutaka.

Пераможца выступіць на сцэне Бардаў 2025 і атрымае грашовую ўзнагароду.

Усе падрабязнасці — у рэгламенце конкурсу на сайце tutaka.org.

Дзе і калі адбудзецца фестываль

Сёлета Фестываль «Бардаўская восень» адбудзецца на Беласточчыне — у Бельску Падляшскім 24-25 кастрычніка 2025 года. 

Увесь час свайго існавання фестываль быў адной з галоўных пляцовак рэпрэзентацыі беларускамоўнай аўтарскай творчасці і месцам сустрэчы розных пакаленняў творцаў. 

«У гэтым годзе мы зноў хочам падкрэсліць, што „Бардаўская восень“ — гэта не толькі музычная падзея. Музыка застаецца асновай фестывалю, але поруч з ёй гучней заявіць пра сябе мастацтва слова ў самых розных формах. Юбілейная праграма аб’яднае канцэрты, літаратурныя дыскусіі, паэтычныя выступы і паказы мастацкага кіно. Тут будуць абмяркоўвацца новыя ідэі, важныя пытанні і свежыя творчыя падыходы», — кажуць арганізатары.

Сачыце за навінамі. Арганізатары абяцаюць неўзабаве абвесціць праграму фэсту.