Кампанія «Наша мова» пры падтрымцы АРР «Дзедзіч» запускае конкурс коміксаў і мемаў сярод берасцейскіх дызайнераў, мастакоў і творчай моладзі.

Перад удзельнікамі стаіць задача стварыць тэматычныя малюнкі, аб’яднаныя агульным сюжэтам і тэмай любові да роднай зямлі, яе культуры і гісторыі. Арганізатары абяцаюць пераможцам каштоўныя і арыгінальныя прызы.

Малюйце коміксы аб берасцейскіх героях, рабіце патрыятычныя «фотажабы» або прыдумляйце новыя мемы — галоўнае, каб дасланая на конкурс работа была арыгінальная і складалася з не менш чым чатырох паслядоўных малюнкаў. Крэатыўны падыход да задання і навагоднія матывы толькі вітаюцца!

Тварыць можна як традыцыйным спосабам «ад рукі» (калі ласка, отсканируйте малюнкі перад адпраўкай), так і з дапамогай кампутара/планшэта. Усе дасланыя работы будуць апублікаваныя ў групе «Наша мова», пасля чаго онлайн-галасаванне вызначыць трох пераможцаў.

Прыняць удзел у конкурсе мае права любы аўтар (прафесійны або аматар), без абмежаванняў па ўзросце і месцы пражывання, які зможа выканаць асноўныя ўмовы:

• подпісы на беларускай мове;
• не менш за чатыры малюнкі ў серыі.

Дэдлайн: дасылайце гатовыя працы на электронны адрас info@dzedzich.org або ў групу Вконтакте да 28 снежня.

Галасаванне: 28–29 снежня. Абвяшчэнне пераможцаў: 30 снежня.

Прызы: першае месца — кніга Святланы Алексіевіч і стыльны скетчбук; іншыя фіналісты таксама атрымаюць карысныя прадметы для творчасці і прыемныя навагоднія сюрпрызы.

Даведка:

Кампанія «Наша мова» стартавала ў Берасці ў 2014 годзе. Яна прыцягнула вялікую колькасць актыўных удзельнікаў у свае крэатыўныя праекты. У 2015 годзе кампанія правяла шмат цікавых конкурсаў і мерапрыемстваў: стварэнне паштоўкі “З Днём горада, Брэст!”, шляхецкія танцы, конкурс “Сэлфі па-беларуску”, цыкл бясплатных экскурсій “Я быў тут” і інш.

Тэгі: Берасце, Брэст