Фiльм беларускага рэжысёра Аляксея Палуяна «Courage» перамог на шведскім кінафестывалі дакументальнага кіно Tempo. «Courage» атрымаў прыз за лепшы дакументальны фільм. Пра гэта рэжысёр паведаміў на сваёй старонцы ў Фэйсбуку.
Фота з ФБ Аляксея Палуяна
«Courage» распавядае пра пратэсты 2020 года ў Беларусі на прыкладзе лёсаў актораў «Свабоднага тэатра».
Прэм’ера фільма адбылася 5 сакавіка 2021 года на Берлінскім міжнародным кінафестывалі ў рамках пазаконкурснай праграмы. Паказ фільма «Courage» ўжо адбыўся ў шэрагу еўрапйскіх краінаў і ў ЗША. Фільм трапіў у праграму Амстэрдамскага кінафестывалю — аднаго з найбольш аўтарытэтных фестываляў дакументальнага кіно. «Courage» нават кваліфікаваўся на прэмію «Оскар» у катэгорыю лепшых дакументальных поўнаметражных фільмаў, але ў шорт-ліст не трапіў.
