У выдавецтве «НПП Регула» выйшла кніга Івана і Кацярыны Кірчукоў «Кветка Перуна», у якой прадстаўлены вынік шматгадовай працы аўтараў, сцэнарыі абрадаў, святаў, казак, гульняў і тэатралізаваных прадстаўленняў, якія былі распрацаваны на аснове беларускага фальклору.
Прэзентацыя кнігі адбылася 1 красавiка у Mінску, у Мастацкай галерэі «Універсітэт культуры». Апроч прэзентацыі кнігі, на вечарыне адбыўся паказ монаспектакля Iвана Кiрчука «Каравай». Пра гэта напісаў на сваёй старонцы ў Фэйсбуку Альфрэд Мікус.
Ён з’яўляецца аўтарам большасці фотаздымкаў — а менавіта 115 са 160, размешчаных у кнізе.
Фота з ФБ Альфрэда Мікуса
«У жыцці заўсёды ёсць месца цуду! Матэрыял для кнігі збіраўся ў экспедыцыях па Беларусі больш за трыццаць гадоў. Чатырнаццаць гадоў папка з запісамі праляжала ў стале і магла быць ад адчаю спаленая на дачы разам з іншымі незапатрабаванымі людзьмі і часам запісамі і малюнкамі. Але гэтага не адбылося. Таму што цуд ёсць! Таму што ёсць неабыякавыя людзі, людзі, якія любяць сваю Радзіму, свой народ, мінулае і сучаснасць, гісторыю і нацыянальную культуру», — прыводзіць словы Івана Кірчука на сваёй старонцы ў Фэйсбуку Альфрэд Мікус.
Даведнік «Кветка Перуна» адрасаваны выкладчыкам, настаўнікам, кіраўнікам фальклорных, тэатральных калектываў і студый, прафесійным калектывам, вучням сярэдняй школы, студэнтам устаноў вышэйшай адукацыі, а таксама ўсім, хто цікавіцца духоўнай спадчынай беларускага народа.
