Каардынатар агульнанацыянальнай культурніцкай кампаніі «Будзьма беларусамі» Алена Макоўская і прадстаўнік Marketing.by Сяргей Скараход адказалі на некаторыя нашыя пытанні наконт першага фестывалю беларускамоўнай рэкламы «Adnak!».
– Што за назва такая ў фестывалю – «Adnak!»?
Алена Макоўская:
– Мы вырашылі, што раз фестываль беларускамоўнай рэкламы, то і назва мусіць быць беларуская. Слова «аднак» мае шмат значэнняў, але клічнік, пастаўленны ў канцы, скіроўвае нас да разумення, што гэта такі своеасаблівы выклік, пачатак адліку і адначасна сцверджанне. Выкарыстанне лацінкі адпавядае сучасным тэндэнцыям, а пачатак слова «AD» – гэта першыя літары слова «рэклама» – «advertisement», што, я думаю, таксама заканамерна.
Алена Макоўская
– Фестываль – гэта заўжды ўдзел «зорак». Ці будзе цікавіць удзельнікаў ваш фестываль як сур’ёзны? Чаму, напрыклад, у тым жа «Белым квадраце» не арганізаваць дзень беларускай рэкламы?
Сяргей Скараход:
– Фестываль «Adnak!» не будзе такім строгім па патрабаваннях да працаў, і мы не ставім на першы план спаборніцкія матывы, як гэта робіцца ў звычайных конкурсах. Галоўная мэта фестывалю – акрэсліць становішча беларускамоўнай рэкламы на сучасным этапе. Неабходна не толькі сабраць максімальную колькасць працаў і ўдзельнікаў, але і зразумець, як далей будзе развівацца гэты кірунак рэкламы ў нашай краіне. А што да зорак, то іх і ў журы, і сярод удзельнікаў будзе нямала.
Сяргей Скараход
Алена Макоўская:
– Мне падаецца што беларускамоўная рэклама можа быць паўнавартаснай сама па сабе, што, канечне, не выключае ўдзелу і ў «Белым квадраце». Але нашая мэта як грамадскай кампаніі ў дадзеным выпадку – узняць прэстыж выкарыстання беларускай мовы ў рэкламе, прадэманстраваць яе найлепшыя здабыткі, а таксама актуалізаваць пытанне пра тое, што сёння попыт на гэтую рэкламу, згодна з сацыялагічным даследаваннем, якое мы рабілі ў мінулым годзе разам з лабараторыяй « Новак» і Беларускім інстытутам стратэгічных даследаванняў (Літва), перавышае прапанову. Пра гэта варта задумацца як рэкламным агенцтвам, так і рэкламадаўцам.
– У палажэнні фестывалю запісана, што на конкурс прымаюцца працы, якія не прайшлі ўзгаднення ў замоўцы. Што гэта значыць і навошта выкарыстоўваецца?
Сяргей Скараход:
– Такое ўдакладненне ў палажэнне фестывалю было ўнесенае нядаўна. Той, хто працуе ў сферы маркетынгу, ведае, колькі рэкламы застаецца ў «загашніку» кампаній. Распрацавалі класную рэкламу на беларускай мове, усё спадабалася, аднак мова павінна быць не беларуская, вось і адкладаюцца рэкламныя праекты да лепшых часоў. Думаю, такія часы насталі. Гэтыя працы будуць ацэньвацца асобна.
– Як наконт арганізацыі сустрэч удзельнікаў фестывалю, абмеркавання прававога поля беларускай рэкламы?
Сяргей Скараход:
– У межах нашага фестывалю плануецца правядзенне некалькіх прэс-ланчаў, прысвечаных абмеркаванню праекту закона «Аб рэкламе». Удзельнікі фестывалю, прадстаўнікі прэсы будуць мець магчымасць сустрэцца з зацікаўленымі асобамі і абмеркаваць свой варыянт праекту.
– Чаму вы ўпэўненыя ў поспеху фестываля беларускамоўнай рэкламы «Adnak!»?
Сяргей Скараход:
– Па-першае наш фестываль будзе цікавы рэкламадаўцам. Рэклама з выкарыстаннем беларускай мовы прываблівае больш увагі, чым рускамоўная рэклама, ужо таму, што яе менш. Спецыялісты адзначылі, што беларуская мова нядрэнна ўздейнічае на моладзевую аўдыторыю. Яскравым прыкладам з’яўляецца беларуская рэклама «Samsung».
Алена Макоўская:
– Правядзенне такога фестывалю – гэта адказ на сацыяльнае запатрабаванне грамадства. Аднак гаворка ідзе не толькі пра мову. Рэклама, як любое мастацкае ўвасабленне, павінная адлюстроўваць ментальныя асаблівасці нашага народа, яго традыцыі, толькі тады яна стане паспяховай і эфектыўнай. Наш фестываль – крок наперад у гэтым кірунку.
Гутарыла Дар’я Яцэвіч
