Сёння ў Нацыянальнай бібіліятэцы Беларусі адбудзецца прэзентацыя першага фундаментальнага даследавання, прысвечанага з’яўленню ўнікальнага феномена айчыннай гісторыі, сапраўднага культурнага брэнда Беларусі — Буквара.

Гонарам айчыннай культуры з’яўляецца той факт, што першая ў свеце кніга, якая мела назву «Буквар», была выпушчана беларускай друкарняй. Аднак нягледзячы на тое, што Беларусь адыграла выключна важную ролю ў станаўленні буквара і пашырэнні гэтага выдання ў свеце, для шырокай публікі і нават для саміх беларусаў гісторыя гэтага феномена заставалася амаль невядомай.

Сёлета выдавецтва «Беларусь» выпусціла грунтоўную працу Аляксандра Сушы «Беларускі Буквар», у якой шырока прадстаўлена тысячагадовая гісторыя галоўнай кнігі для навучання грамаце — ад старажытнасці і з’яўлення пісьменства ў Беларусі ажно да нашых дзён. На падставе тысяч архіўных і апублікаваных крыніц з розных краін (Аўстрыі, Вялікабрытаніі, Германіі, Даніі, Ірландыі, Італіі, ЗША, Латвіі, Літвы і інш.) атрымалася паказаць, па якіх падручніках вучыліся нашы продкі, як пачынаўся шлях да ведаў розных пакаленняў беларусаў, якія сімвалы і вобразы ўкладваліся ў змест пачатковай адукацыі ў мінулым.

Разам з фундаментальнай навуковай працай «Беларускі Буквар» будзе прэзентавана багата ілюстраваная кніга для моладзі «Вынаходства Буквара ў Беларусі», якая таксама нядаўна выйшла ў выдавецтве «Беларусь» (у серыі «Беларуская дзіцячая энцыклапедыя»).

Аўтарам выданняў з’яўляецца вядомы кнігазнавец і культуролаг, намеснік генеральнага дырэктара Нацыянальнай бібліятэкі Беларусі Аляксандр Суша. Менавіта ён у 2012 г. перавыдаў найбольш старажытны айчынны Буквар з тых, што сёння захоўваюцца ў Беларусі, а ў 2016–2018 гг. вярнуў з забыцця самую першую ў свеце кнігу пад назвай «Буквар», якая захавалася ў адзіным экзэмпляры ў Лондане. 400-гадовы юбілей першага ў свеце «Буквара» Нацыянальная бібліятэка Беларусі адзначыла шэрагам мерапрыемстваў.

Прэзентацыя пачнецца а 16-й гадзіне ў галерэі «Лабірынт» (3-ці паверх). Уваход вольны!

nlb.by