Сёння спаўняецца 65 гадоў паэту, музыку, перакладчыку, адному з пачынальнікаў беларускай аўтарскай песні Алесю Камоцкаму. Спадар Алесь нарадзіўся ў Барысаве, спявае як на ўласныя вершы, так і на вершы беларускіх паэтаў Уладзіміра Караткевіча, Рыгора Барадуліна, Уладзіміра Жылкі і інш, як аўтар і выканаўца выступае з пачатку 1980-х. У творчай скарбонцы Алеся Камоцкага больш за дзесяць альбомаў і некалькі зборнікаў уласнай паэзіі.
Ад імя рэдакцыі budzma.org павіншавалі спадара Алеся з юбілеем ды паразмаўлялі з ім пра натхненне, музыку і іншае жыццёвае.
Спадар Алесь, шчыра віншуем Вас з Народзінамі! Чым зараз займаецеся? Як Вашае здароўе?
Дзякуй! Займаюся тым, чым заўсёды займаўся. Боўтаннем у прасторах дададзеных рэальнасцяў. Здароўе у межах дапушчальнага.
У чым знаходзіце сілы і натхненне?
У веры ў тое, што людзі застануцца людзьмі.
Ці пішуцца зараз песні, вершы? Мо хацелі б падзяліцца з нашымі чытачамі?
Песні, вершы пішуцца. Невялікі прыклад:
Час пачуўся, мы пайшлі
Ва ўсе бакі зямлі,
Каб натрапіць, хто на мэту, хто на лёс.
Кожны мроіў як умеў,
Быў у кожнага намер,
Кожны рос, але не кожны разумнеў.
Смак крутых дзіцячых мрой
І рашучы свой настрой
Разгубляць знайшлі магчымасць па жыцці.
Важкіх справаў марны сэнс
Адмяніў агонь вачэй,
Навучыў за ўсё, што маем, заплаціць.
Новы крок.
Уперад ён, назад, ці ў пэўны бок.
Новы крок.
Губляецца ў тысячах дарог.
Штосьці з марамі не так,
Марым мары абы-як,
Неяк цяжка разабрацца дзе чые.
Зрэшты, кожнаму сваё,
Вынік розны дастаём,
А пытанняў да адказаў не стае.
Якія месцы ў Беларусі Вам найбольш блізкія?
Бульвар Шаўчэнкі ў Мінску. Бо там жыву.
Якія мясціны параілі б абавязкова наведаць тым, хто зараз у Беларусі?
Проста параіў бы пры кожнай магчымасці ехаць, шукаць, знаходзіць, не знаходзіць і зноў ехаць.
Кім Вы марылі стаць у дзяцінстве?
Абы не салдатам.
Падзяліцеся, калі ласка, калі памятаеце, як напісалі першы верш ці песню?
Чытаў вершы Жылкі і раптам заспяваў.
Чым запомніўся Вам першы ўласны канцэрт?
Тым, што не верыў, што змагу даспяваць да канца.
Што лічыце сваім самым вялікім дасягненнем?
Пакуль толькі на шляху да гэтага.
Ці лічыце сябе шчаслівым чалавекам?
А то ж!
І на завяршэнне Ваш топ-5 песень беларускіх выканаўцаў?
Вельмі цяжка вызначаць канкрэтныя песні, на жаль. Іншыя пакрыўдзяцца.
А па выканаўцах так: да 90-х — мінскія Песняры, на пачатку 90-х — барысаўскія Rouble Zone і цэлы час — гарадзенскі Віктар Шалкевіч.
Зычым доўгіх гадоў юбіляру, здароўя і натхнення!
budzma.org, фота з асабістага архіва Алеся Камоцкага
