Фестываль кароткіх стужак INTERFILM праходзіць у Берліне ўжо 38 раз. У гэтым годзе ён ён адкрыецца 15 лістапада і працягнецца да 20 лістапада.
«Ад язычніцкіх каранёў да нашых дзён, у цэнтры ўвагі: Беларусь раскрывае гістарычныя, культурныя і сацыяльныя аспекты еўрапейскай краіны, сумна вядомай сваёй палітычнай сітуацыяй. Праграма распавядае пра часы росквіту краіны, барацьбу за свабоду і нягоды жорстка прыгнечаных. На экране стваральнікі фільма выразна асвятляюць самыя ўразлівыя і балючыя тэмы з дапамогай сатыры, метафар і музыкі, праліваючы святло на несправядлівасць і выкрываючы вінаватых. Гэтая захапляльная гісторыя надзеі і спусташэння пачынаецца на ўзроўні аднаго чалавека і ў канчатковым рахунку ахоплівае ўсю Беларусь», — пішуць арганізатары.
Адной са стужак з’яўляецца кароткаметражны анімацыйны фільм ад «Будзьма беларусамі!» пад назвай «Гісторыя Беларусі за 5 хвілін». Гэты анімацыйны фільм, прысвечаны гісторыі Беларусі ад яе пачатку да нашых дзён, пабачыў свет 11 год таму. Аўтарамі ідэі былі Юлія Ляшкевіч і каманда кампаніі «Будзьма беларусамі!». Рэжысёрка, мастачка і аніматарка праекта — Юлія Рудзіцкая. Тэкст і музыку напісаў Лявон Вольскі, а агучыў музыка Аляксандр Памідораў.
Таксама ў беларускай праграме пакажуць стужку «Mamie, Vanya et la Chèvre» Дар’і Юркевіч, кліп гурта «Ляпис 98» пад назвай «Брежнев» Караліны Паляковай і Ганны Крук, ролік «Freedom Belarus 2.0» Марыі Міхальчук, кароткаметражку «We’re going out» Арсенія Алейніка, музычнае відэа гурта «Sož» пад назвай «Malako» (рэжысёр Al Medwedsky), кліп гурта «Nizkiz» з назвай «Правілы» Георгія Бізюка, стужку «Страшны Суд» Веранікі Балоцінай, «Let’s Meet Tonight» Максіма Буйніцкага, кліп Вовы Ёдава для гурта «Дай дарогу» на песню, прызнаную экстрэмісцкай у Беларусі, фільм Святланы Казлоўскай і Кірыла Галіцкага «Пляж / Лес / Тамбур».
Беларускія стужкі пакажуць 17 лістапада а 18 30 па мясцовым часе ў Unterfilm Clubkino і 20 лістапада а 20 30 ў ACUD Kino. Квіткі — па спасылцы.
