Кіраўніцтва Паўночнай Карэі абвесціла самую сапраўдную вайну музыцы і кіно з Паўднёвай Карэі. Лідэр краіны Кім Чэн Ын назваў папулярную паўднёвакарэйскую музыку (K-pop) «ракавай пухлінай», якая разбэшчвае моладзь КНДР.
Цяпер за распаўсюд запісаў пагражае вышэйшая мера, а за прагляд і праслухоўванне — да 15 гадоў працоўных лагераў. У траўні гэтага года СМІ паведамлялі, што жыхар КНДР быў нібыта пакараны смерцю за тое, што прадаваў дыскі і флэшкі з паўднёвакарэйскім кіно. Аднак многіх паўночнакарэйцаў не спыняе такое пакаранне.
У красавіку 2021 года Кім Чэн Ын настойліва папярэджваў, што «культурнае ўварванне Паўднёвай Карэі выйшла за межы дапушчальнага ўзроўню». Характэрна, што ў КНДР таксама жорстка змагаюцца з распаўсюдам японскай і амерыканскай культуры.
Пры гэтым самае пацешнае, што «забаронены кантэнт» — гэта не столькі палітычныя фільмы, колькі меладрамы і «мыльныя оперы», якія распавядаюць пра звычайнае жыццё і побыт. Нягледзячы на магчымасць жорсткага пакарання, жыхары КНДР ўсё-ткі знаходзяць спосабы паглядзець паўднёвакарэйскае кіно: тэлевізары падключаюць да аўтамабільных акумулятараў, а фільмы распаўсюджваюць на абароненых паролем флэшках.
Нагадаем, што пасля таго, як краіна цалкам закрыла межы з-за пандэміі, Кім Чэн Ын запатрабаваў забараніць не толькі прадметы, якія ўвасабляюць «капіталістычны лад жыцця» — джынсы, хатніх сабак, футболкі з назвамі заходніх брэндаў, але і зрабіў больш жорсткімі пакаранне за прагляд фільмаў і серыялаў з Паўднёвай Карэі, Японіі або ЗША.