Выдавецтва Grunwald Publishing выпусціла «Беларускую кулінарную кнігу» («The Belarusian Cookbook») Алеся Белага ў перакладзе на ангельскую мову. Гэта істотна перапрацаванае, пашыранае і абноўленае выданне працы, якая ўпершыню з’явілася па-ангельску ў 2009 годзе ў выдавецтве Hippocrene Books, паведамляе bellit.info.

«The Belarusian Cookbook» — гэта грунтоўнае выданне, якое ўключае каля 200 рэцэптаў і больш за 50 здымкаў. Чытачы пазнаёмяцца як са шляхецкімі стравамі, так і з тым, што гатавалася на вясковых кухнях. У кнізе выяўлены сотні гадоў беларускіх, ашкеназскіх, татарскіх, польскіх і літоўскіх традыцый, якія суседнічалі і ўзбагачалі адна адну ў нашым краі. Некаторыя рэцэпты перадаваліся з пакалення ў пакаленне, іншыя рэканструяваныя са старых кніг, а многія ўпершыню з’яўляюцца на ангельскай мове — усе адаптаваныя для сучаснай кухні 21-га стагоддзя.

«Гэтае выданне ад Grunwald [...] ёсць найбольш поўнай кнігай рэцэптаў беларускай кухні, даступнай на англійскай мове,»

Кнігу ўжо можна купіць непасрэдна праз сайт выдавецтва Grunwald.ca, а ў верасні выданне будзе даступнае на Amazon Canada & USA (FBA), а таксама ў Еўропе.