У гэтую нядзелю пройдзе Мінскі паўмарафон. Радая паведаміць вам, што чацвёра супрацоўнікаў амбасады возьмуць у ім удзел. Асабіста я абмяжуюся забегам у катэгорыі 10,5 км. Не ўпэўненая, што змагу пераадолець гэтую адлегласць, не пераходзячы перыядычна на крок, але абмежаванне для 10,5 км – дзве гадзіны, і я думаю, што змагу ўкласціся ў гэты час.
Магчыма, натхніўшыся нядаўняй Алімпіядай ці проста кіруючыся жаданнем весці здаровы лад жыцця і больш займацца спортам, у гэтым годзе рэкордная, як мне здаецца, колькасць людзей усіх узростаў і самых розных здольнасцяў возьме ўдзел у марафоне. Сярод удзельнікаў будзе грамадзянін Вялікабрытаніі Дарэн Бут.
Дарэн жыве ў Беларусі і ўпершыню ўдзельнічае ў марафоне. Яго ўдзел асабліва натхняе, бо менш за два гады таму, у кастрычніку 2014-га, Дарэн трапіў у аварыю на матацыкле, у выніку якой яму ампутавалі нагу ніжэй за калена. Але Дарэн прабяжыць марафон цалкам, 21 кіламетр, і спадзяецца, што будзе бегчы ўсю дыстанцыю, але калі спатрэбіцца, скарыстаецца інвалідным крэслам, каб завяршыць забег.
Ён удзельнічае для таго, каб прыцягнуць увагу да людзей з абмежаванымі магчымасцямі і паказаць, што яны могуць жыць пры правільнай падтрымцы такім жа паўнавартасным жыццём, як здаровыя людзі.
Яшчэ адна мэта яго забегу – сабраць грошы для дабрачыннай арганізацыі “Крылы анёлаў”, якая дапамагае дзецям з абмежаванымі магчымасцямі, набываючы спецыяльныя каляскі для дзяцей з асаблівасцямі развіцця. У арганізацыі спадзяюцца, што сабраных грошай хопіць, каб набыць каляску, што дазволіць арганізоўваць мерапрыемствы, дзе дзеці змогуць збірацца разам. У нядзелю Дарэн будзе бегчы разам з дзецьмі, якіх падтрымлівае арганізацыя. Падтрымайце іх, калі ласка, калі яны будуць прабягаць міма.
Больш падрабязную інфармацыю пра ініцыятыву “Крылы анёлаў” і тое, як яе можна падтрымаць, шукайце на нашай старонцы ў Фэйсбуку, УКантакце і Твітары.
Фіёна Гіб
