Шаноўныя сябры! Ужо 20 дзён трывае збор грошай на першы ў Беларусі помнік нашаму слаўнаму земляку, выдатнаму сыну Беларусі Андрэю Тадэвушу Касцюшку. Помнік мае паўстаць на ягонай малой Радзіме – у Марачоўшчыне, поруч з ягонай сядзібай-музеем. Натхнёныя тым, што помнік Касцюшку паўстаў у Залатурне з ініцыятывы беларускай дыяспары ў Швейцарыі, ужо 530 беларусаў далучыліся да збору сродкаў на першы беларускі помнік нашаму нацыянальнаму герою. За гэты час сабрана 78% неабходных сродкаў, або 13700 рублёў. Застаецца сабраць 22% або 3800 рублёў (гэта каля 1950 даляраў ЗША).

Эскіз помніка стварыў менскі скульптар Генік Лойка. Калі грошы будуць сабраныя ў час, то мяркуецца паспець з адкрыццём да 4 лютага 2018 года – Дня народзінаў Тадэвуша Касцюшкі. Імёны фундатараў плануецца змясціць у спецыяльным месцы ў будынку сядзібы-музея Касцюшкі.

Каб ахвяраваць грошы, перайдзіце, калі ласка, па спасылцы, абярыце неабходную суму ахвяравання і зрабіце пералік са свае карткі. У выпадку тэхнічных праблем пішыце ў службу падтрымкі сайта «Талака» на мэйл support@talaka.by. Магчыма, будзе карысная парада нашага суайчынника з Канады, які сутыкнуўся з такімі цяжкасцямі, але вырашыў іх: «Для замежнікаў. Калі просяць верыфікацыю, то трэба паглядзець у анлайн банк і патэлефанаваць туды ды запытаць суму, заблакаваную у амерыканскіх далярах. Напрыклад, у мяне было 4.65 канадыйскіх. я ў анлайн банку паглядзеў, але колькі гэта будзе у амерыканскіх, не убачыў. Трэба каб табе сказалі ў банку па тэлефоне. Потым гэту суму ўводіш – і працэс пайшоў!”.

Паставім помнік Касцюшку на ягонай Радзіме разам!

З павагай, каардынатар ініцыятывы Глеб Лабадзенка