Трэба тэрмінова адрэдагаваць фота, а ў руках толькі смартфон ці планшэт? Не бяда! Вось добрая падборка фоташопаў, якія дазволяць хутка і якасна апрацаваць патрэбны вам фотаздымак ці малюнак!
Photoshop express
Назва кажа сама за сябе – фоташоп і экспрэс. Сапраўды хуткі інструмент для апрацоўкі фота. Функцый мала, наладаў падрабязных няма – выключна перадналады. Але тое, што ёсць, працуе сапраўды якасна. Такі варыянт падыдзе, калі трэба хутка ўпрыгожыць фота, змяніць яго памер і/ці нешта замазаць, калі гэта партрэтнае фота. Інтэрфейс абсалютна просты і інтуітыўны, у чым вялікі плюс. Таму для хуткага стварэння не найгоршага здымка падыдзе. Функцыянал бясплатны, але патрабуе ўваходу ў сістэму Adobe.
Функцыі:
- Фотафільтры
- Рамкі
- Выдаленне эфекту чырвоных вачэй
- Выпраўленне дэфектаў фота
- Замазка
- Абрэзка
Snapseed
Чарговы раз Google. І чарговы раз яны робяць выдатную праграму! Гэта сапраўды выдатны інструмент для даволі падрабязнай працы з фота ў дарозе. Тут ёсць і аўтаматычныя фільтры, і накладанне тэксту, і поўная ручная апрацоўка фота… карацей, амаль усё, што можа спатрэбіцца ад хуткай і мабільнай апрацоўкі фота. А самае смачнае – ніякай платнай версіі і рэгістрацыі! Але ёсць пэўны мінус – функцый настолькі шмат, што, каб усё зразумець, давядзецца доўга пасядзець.
Функцыі:
- Карэкцыя
- Баланс белага
- Фільтры
- Кадраванне
- Перспектыва, паварот і г.д.
- Крывыя
- Пашырэнне фота
- Двайная экспазіцыя
- Размыццё
- Накладанне тэксту
- Рамкі
- Эфект HDR
Instasize
Па дызайне праграма нагадвае Instagram. Функцыянал нечым падобны да Photoshop Express, Але тут ёсць больш дакладнае рэдагаванне самога фота. Фотаздымкі атрымліваюцца неблагія для такога хуткага і невялікага фотарэдактара. Інтэрфейс зразумелы, але каб усё зразумець давядзецца крыху пакапацца па ўкладках. Праграма мае рэкламу і прэміум-фільтры з функцыямі. Кошт – каля 3,5 даляраў у месяц, але бясплатнай версіі для аматарскага рэдагавання хопіць з галавой!
Функцыі:
- Фота ці калаж
- Фільтры
- Рэдагаванне фота
- Абрэзка
- Накладанне тэксту
- Шпалеры (фон для здымку)
- Паварот фота
Nebi
Трэба ці хочацца накласці эфект 35 мм фотастужкі? Тады Nebi стане для вас выдатным варыянтам. З функцый… толькі эфект фотастужкі. Больш нічога – увогуле. Інтэрфейс абсалютна просты – абіраеце фільтр, рэгулюеце моцнасць эфекту і захоўваеце – вось і ўсё! Сама праграма абсалютна бясплатная – толькі зрэдку з’яўляецца рэклама.
Функцыі:
- Эфект фотастужкі 35 мм
Pixlr
У нечым залатая сярэдзіна. Просты інтэрфейс, неблагі камплект функцый, сярод якіх і даволі цікавыя наладкі: з іх дапамогай можна па-хуткаму пакрэатывіць, чаго ад не дачакаешся ад велізарнага snapseed. Таму калі вам патрэбны фоташоп з цікавасцямі і без залішніх замарочак – добры варыянт! Платных функцый не заўважана.
Багдан Сакалоў
