21 лістапада ў Віцебску адбылася прэм’ера пастаноўкі «Ціль» аб адважным і знаходлівым правадыру гёзаў, якія змагаліся супраць тыраніі, а сёння спектакль ужо здымаюць з афіш, паведамляюць «Народныя навіны Віцебска».

Міхаіл Краснабаеў з трупай падчас рэпетыцый спектакля «Ціль». Фота Нацыянальнага акадэмічнага драматычнага тэатра імя Якуба Коласа

Гэтая пастаноўка мастацкага кіраўніка тэатра Міхаіла Краснабаева паводле п’есы Рыгора Горына, заснаванай на рамане Шарля дэ Костэра, рыхтавалася да 95-годдзя Нацыянальнага акадэмічнага драматычнага тэатра імя Якуба Коласа.

Міністр культуры на 95-годдзе Нацыянальнага акадэмічнага драматычнага тэатра імя Якуба Коласа. фота kult.1prof.by

У нядзелю, 21 лістапада, адбылася ўрачыстая прэм’ера, на якую было запрошана кіраўніцтва горада і вобласці, а таксама прысутнічаў міністр культуры Беларусі.

Не зразумела, якую крамолу ўбачылі чыноўнікі ў спектаклі, але, паводле крыніц «ННВ», пастаноўку знялі з паказаў, а дырэктара тэатра выклікалі ў сталіцу.

Паведамленне аб адмене спектакля

Пацвярджэннем таго, што спектакль «Ціль» трапіў у няміласць, стала тое, што ён пачаў знікаць з афіш. На сайце kvitki.by прадаваліся квіткі на гэтую пастаноўку на 11 снежня, але цяпер паведамляецца аб адмене спектакля. У афішы самога тэатра на гэты дзень зараз ужо не варта ніякіх спектакляў.