Адкрыццё выставы “Тураўскія краявіды” мастака Рыгора Данчанкі адбылося 30 красавіка ў Доме рамёстваў раённага цэнтру Шаркаўшчына Віцебскай вобласці.

Выставу адкрыў старшыня творчай суполкі “Пагоня” Аляксей Марачкін. У прысутнасці выхаванцаў мастацкай школы ён апавёў пра творчы шлях Рыгора Данчанкі, яго адметную жывапісную манеру, каларыстыку натурных эцюдаў.

“Творы Рыгора Данчанкі, аб’яднаныя пад агульнай назвай “Тураўскія краявіды”, у абвешчаны Год роднай зямлі пашыраюць магчымасці духоўнага пранікнення ў прыгажосць гістарычнай Тураўшчыны праз мастацкі вобраз”, – адзначыў Аляксей Марачкін.

На адкрыцці выставы таксама прысутнічалі дырэктар Дому рамёстваў Вікторыя Дубоўская, выкладчыкі мастацкай школы Віктар Крук і Яўген Ліпскі, мастак Ігар Марачкін, мясцовыя жыхары, навучэнцы мастацкай школы.

Пры канцы імпрэзы мастак Аляксей Марачкін падараваў выкладчыку мастацкай школы Віктару Круку мадэль скульптуры помніка Еўфрасінні Полацкай, створаную скульптарам Ігарам Голубевым.

Адкрыццё мастацкай выставы Рыгора Данчанкі ладзілася ў межах кампаніі “Будзьма беларусамі!”.

Выстава “Тураўскія краявіды” будзе доўжыцца да канца траўня 2009 году.

Тэгі: Віцебшчына, Шаркаўшчына