Святочны канцэрт, прысвечаны Міжнароднаму дню помнікаў і мясцінаў, адбыўся ў нядзелю 19 красавіка ў мінскім Палацы дзяцей і моладзі. Імпрэза сталася фінальнай часткай “Фэсту экскурсаводаў”, што праходзіў 17-19 красавіка ў Мінску ды іншых гарадах Беларусі.

Пра мэты фэсту распавядае краязнаўца ды экскурсавод, вядоўца канцэрта Цімох Акудовіч:

– Сённяшні канцэрт – гэта спроба нагадаць пра тыя беларускія помнікі, што знаходзяцца зараз у занядбаным стане, у той жа час – магчымасць парадавацца за тую спадчыну, якая аднаўляецца.

На канцэрце прысутнічаў старшыня “Беларускага камітэту Міжнароднай Рады па помніках і мясцінах (ІКАМОС)” Уладзімір Гілеп. З нагоды працы гэтага камітэту пэўныя помнікі могуць быць залічаныя ў склад агульнасусветных каштоўнасцяў. Падчас сваёй прамовы Уладзімір Гілеп адзначыў вынікі фестывалю экскурсаводаў:

– Ініцыятыва правядзення гэтага фэсту належыць моладзі. Шчыра прызнаюся, спачатку я не верыў, што гэта свята пройдзе с поспехам. Але зараз можна ўпэўнена сказаць, што фэст атрымаўся ўдалы.

Своеасаблівай кульмінацыяй канцэртнай праграмы сталася дэманстрацыя шэрагу фотаздымкаў розных помнікаў ды мясцінаў. Актуальнасць фотазамалёўкі – кантраст паміж добрым станам адных помнікаў і кардынальнай закінутасцю іншых.

Падчас канцэрту наведвальнікі маглі паслухаць бардаў Інэсу Леаданскую і Аляксея Галіча, а таксама паўдзельнічаць у мінівіктарыне і атрымаць каштоўны прыз.

Сапраўдную экзатычнасць святочнай праграме надаў гурт “Рэха”. Багатае па энергетычнасці шоў у выкананні музыкаў здольнае было разварушыць самых сонных наведвальнікаў. Песню “трактар Беларусь” музыканты спявалі разам з усёй заляй.

Напрыканцы свайго выступу музыканты павіншавалі ўсіх прысутных са святам.

Гурт “Рэха”:

-Прыемна бачыць вашы прыгожыя твары. Радасці, здароўя, шчасця вам, сябры!

На працягу “Фэсту экскурсаводаў” прайшло каля 30 экскурсій па Мінску, Полацку, Брэсце ды іншых гарадах. Колькасць удзельнікаў кожнай з іх склала ад 20 да 120 чалавек. Пра тое, як праходзілі экскурсіі распавядае Цімох Акудовіч :

– Старшыня лошыцкай арганізацыі ветэранаў далучыла да экскурсіі ўсіх ветэранаў з Лошыцы. У Татарскай слабадзе на экскурсію прыйшлі татары, потым доўга высвятлялі, у каго якія татарскія карані. Праводзілася нават экскурсія для зняволеных Заслаўскай калоніі.

У гэты вечар сярод аматараў беларускай гісторыі пераважаў добры настрой.

Наведвальніца канцэрту Таццяна:

-Такія імпрэзы – добры сродак больш даведацца пра беларускае мінулае.

На фота:

1. Танец пад паланэз Агінскага “Развітанне з радзімай”
2. Інэса Леаданская
3. Узанагароджанне аднаго з пераможцаў мінівіктарыны
4. Гурт “Рэха”

Тэгі: Мінск