Адзін з самых адметных гарадзенскіх мастакоў Аляксандр Сільвановіч праз месяц адсвяткуе 50 год. З гэтай нагоды ў Гродзенскай выставачнай зале адкрылася ягоная вялікая выстава, дзе можна пабачыць працы як 1992-га года, гэтак і 2015-га. Яна называецца “Неба”.
“Неба гэта прастора маёй творчасці, тэрыторыя кахання, дабра, чысціні і свабоды, куды я вас запрашаю”, – сказаў на адкрыцці аўтар. Павіншаваць яго з выставай і надыходзячым юбілеем прыйшлі сябры, аматары творчасці, консулы Польшчы і Літвы, чыноўнікі, калегі па саюзе мастакоў.
У творах, паказаных на выставе, паўтараюцца матывы, даўно заўважныя ў творчасці мастака. Гэта анёлы, рыбы, звычайныя коні і пегасы, птушкі, зоркі, сонца і месяц. Тыя, хто ведае Сільвановіча толькі як мастака галерэйнага фармату, можа даведацца пра яго манументальныя працы, самая вядомая з якіх – пано з птушкамі на вуліцы Савецкай, створанае ў 2000 годзе. Гэтаксама сваё месца на выставе заняла афіша спектакля “Фаўст. Сны”, да якога мастак ствараў сцэнаграфію.
Аляксей Табяшэўскі, Твой стыль
