У каталіцкім манастыры сясцёр-назарацянак у Навагрудку з канца жніўня пачынаюць падрыхтоўку да аднаго з галоўных святаў — Раства Ісуса Хрыста. Тут пачалі пячы аплаткі, перадае Белта.

«У Гродзенскай вобласці наш манастыр — адзінае месца, дзе пякуць аплаткі. У саставе, які мы выкарыстоўваем, усяго два інгрэдыенты: вада і мука. Працэс пачынаецца са стараннага прасейвання мукі, а яна ў нас толькі найвышэйшага гатунку, каб не было камячкоў. Пасля спецыяльным міксерам мы змешваем ваду з мукой, таксама вельмі старанна», — дзеліцца рэцэптам галоўнага атрыбута святочнага стала на Каляды сястра Мірыям. Менавіта таму, што ў саставе няма нічога лішняга, аплатка растае ў роце. А ўвогуле яна можа захоўвацца каля года.

У падрыхтоўцы аплатак задзейнічаны тры сёстры. На працягу чатырох гадзін кожны дзень да самага Раства тут пякуць такія аплаткі. «Толькі некалькі гадзін мы адводзім на гэты занятак, астатні дзень ідзе па нашым звычайным раскладзе. Вялікая ўвага — малітве за тых людзей, на чые калядныя сталы патрапяць аплаткі, зробленыя намі», — дадае сястра Мірыям.

Пякуць аплаткі на прэсах з выгравіраванымі клішэ, на якіх намаляваны калядныя сюжэты. Адразу пасля таго, як аплаткі спяклі, яны вельмі хрумсткія. Для таго каб іх можна было разрэзаць — змяшчаюць у адмысловую шафу, у якой падтрымліваецца патрэбная вільготнасць, дзе яны трохі насычаюцца вільгаццю. Для рэзкі таксама ёсць спецыяльныя інструменты, якім ужо шмат гадоў. Ёсць і спецыяльны агрэгат, які робіць маленькія аплаткі, якія выкарыстоўваюць на службах падчас прычасця.

Фотаздымкі Леаніда Шчаглова