Выстава беларускай мастачкі Ніны Маргаевай «Крок насустрач» у Варшаве

15 кастрычніка 2024 года ў Музеі Вольнай Беларусі ў Варшаве адбудзецца адкрыццё выставы Ніны Маргаевай «Крок насустрач». Працы мастачкі адлюстроўваюць глыбокі погляд на штодзённае жыццё, ператвараючы звычайныя пейзажы, простыя формы і прадметы паўсядзённасці ў знакі асабістых перажыванняў і эмоцый.

«Крок насустрач» — спроба трапіць у свет, дзе кожная рэч можа стаць правадніком у глыбіню чалавечых пачуццяў. Выяўляючы штодзённыя рэчы, напрыклад, крэсла ці куток пакоя, Ніна паказвае, як звычайнае робіцца люстэркам унутраных перажыванняў. У працах мастачкі колер і форма граюць ключавую ролю: цёплыя і халодныя адценні змяняюць настрой у залежнасці ад таго, як доўга глядач узіраецца ў выявы. Гэтае сузіранне, гэтая цішыня, што ўтварае ўнутраны рух, — асноўны матыў яе творчасці.

Асаблівае месца ў экспазіцыі займае серыя «Жыццё на пятым паверсе», у якой мастачка адлюстроўвае лёгкасць і складанасць штодзённасці. У абмежаванай прасторы пяціпавярховых кватэр паўстаюць элементы самоты і ізаляцыі, і праз гэтыя вобразы глядач атрымлівае магчымасць асэнсаваць уласныя думкі і эмоцыі. Шматслойныя каляровыя пераходы і мяккасць пастэлі перадаюць пульс жыцця, схаваны за цішынёй статычных аб’ектаў.

Таксама ў экспазіцыі дэманструюцца працы з серый «Баранавічы» і «Палюбіць Варшаву за 100 дзён», якія выходзяць за межы інтэр’ерных выяў і звяртаюцца навонкаві, да свету прыроды і архітэктуры. У гэтых творах мастачка даследуе пульсацыю жыццёвай прасторы не праз фатаграфічную дакладнасць, а праз адчуванне, колер і форму. У гэтых працах горад і прырода робяцца люстэркам людскіх унутраных станаў і разважанняў.
На выставе можна будзе падтрымаць мастачку* і набыць яе працы.

Адкрыццё адбудзецца 15 кастрычніка а 19:00.

Выстава ладзіцца пры падтрымцы Беларускай Рады Культуры. Праз далучэнне СМІ і вядомых творцаў да акцыі Рада працягвае збор сродкаў на дапамогу мастачцы да 15 кастрычніка ўключна. Усе данаты будуць перададзеныя Ніне для пакрыцця медыцынскіх выдаткаў і аплаты дапамогі.

*У студзені 2023 года ў Ніны Маргаевай быў выяўлены бакавы аміятрафічны склероз (БАС) — рэдкае, невылечнае захворванне, якое паступова абмяжоўвае рухальную актыўнасць і патрабуе сталай медыцынскай падтрымкі.