Прэзентацыя кнігі Змітра Дзядзенкі
03.12.2015
19:00 - 21:00
Кніграня "логвінаЎ" (пр. Незалежнасці, 37а)
Бясплатнае
У выдавецтве «Кнігазбор» пабачыла свет кніга прозы Змітра Дзядзенкі «Гісторыі ў прыцемках». Яна сталася шэсцьдзесят сёмым выпускам Бібліятэкі Саюза пісьменнікаў «Кнігарня пісьменніка».
Творы Змітра Дзядзенкі, якія ўвайшлі ў кнігу “Гісторыі ў прыцемках”, вызначаюцца цікавасцю да таямнічага і неспазнанага, а таксама вострасюжэтнасцю. Героі твораў спрабуюць разгадаць загадкі, паходжанне якіх губляецца ў прыцемках гісторыі.
Гэта характэрна як для містычнага апавядання “Яйкі птушкі Рух”, так і для дэтэктыўных аповесцяў “Голем з Малой Мар’ямпольскай” і “Вуаерыст”.
Гісторыя “Голема з Малой Мар’ямпольскай” сюжэтна пераплятаецца з біяграфіяй беларускага першадрукара Францішка Скарыны. Злачынства, якое адбываецца задоўга пасля смерці вялікага палачаніна, здараецца пры ўдзеле невядомых сілаў, а месцы злачынства знаходзяць след гліны. Голем з пражскіх легендаў працягвае помсціць нашчадкам Скарыны за нейкія даўнейшыя правіны…
Зміцер Дзядзенка нарадзіўся ў 1972 годзе ў Оршы. У 1994 годзе скончыў філалагічны факультэт Беларускага дзяржаўнага ўніверсітэта. Пасля навучання паспеў папрацаваць, сярод іншага, рэдактарам на БТ і журналістам у “Нашай Ніве”.
Друкаваўся ў часопісах “Дзеяслоў”, “Полымя”, “Першацвет”, “Паміж”, “Спадчына”. Аўтар краязнаўча-генеалагічнага даведніка “Аршанская шляхта”, зборніка інтэрв’ю “Беларусь: Ні Еўропа, ні Расія”, адзін з суаўтараў кнігі “Наша страва”.
Возьмуць удзел: літаратуразнаўца Ганна Кісліцына і бард Алесь Камоцкі.
Прэс-служба ГА “Саюз беларускіх пісьменнікаў”
